जारको पानीमा मरेको किरा र भातको सिता

धनकुटा । धनकुटामा जारको पानीमा किरा र भातको सिता फेला परेको छ । सुनसरीको इटहरी–१० स्थित हिमधारा कम्पनीले उत्पादन गरेको उपहार नामक जारको पानीको ‘सिलप्याक’ भाँडोभित्र पखेटासहितको मरेको किरा र भातको सात वटा सिता फेला परेको हो ।

Advertisement

धनकुटाको हुलाकटोलस्थित सनोज किराना पसलबाट खरिद गरेर कर्मचारी सञ्चयकोषको सेवा केन्द्रमा लगिएको जारको पानीमा अखाद्य बस्तु फेला परेको हो । सञ्चयकोषका कर्मचारीले आइतबार चार वटा जार खरिद गरेर लगेका थिए ।

जसमध्ये एउटा सिलप्याक भाँडोभित्र प्रस्टै देखिने गरी किरा र भातको सिताहरु देखिएपछि आफूहरू आश्चर्यचकित भएको कर्मचारी सञ्चयकोषका प्रमुख सहायक पूर्ण याखा बताउँछन् । ‘सफा हुन्छ भनेर जारकै पानी ल्याएर खाने गरेका थियौं, अहिले ल्याएको जारको भाँडोभित्र त किरा पनि छ, सात/आठ वटा भातको सिताहरु पनि देखिन्छ,’ याखा भन्छन्, ‘एउटा भाडोमा यस्तो देखेपछि साह्रै घिन लाग्यो, अरु जारको पानी पनि त्यत्तिकै राखेर अहिले धाराको पानी तताएर खाँदैछौं ।’

सञ्चयकोषका कार्यालय प्रमुख दिपेन्द्र सापकोटा जारको पानी उत्पादक कम्पनीको चरम लापरबाही देखिएको बताउँछन् । उनी भन्छन्, ‘चिया छान्नेले नै छान्यो भने पनि यत्ति धेरै फोहोर त आउँदैन, यो त खोलाकै पानी सिधै उठाएर हाले जस्तो भयो, एउटै जारमा यत्ति धेरै फोहोर हुनु त यो मानव स्वास्थ्यमाथि ठूलो खेलवाड हो ।’

उपहार पानी उद्योगकै गाडीले गत शनिवार धनकुटाका बिभिन्न पसलहरूमा बिक्रीका लागि मिनरल वाटर र जारको पानी दिएको थियो । सनोज किरानामा पनि सोही दिन सात वटा जार राखिएको थियो, जसमध्ये एउटा जारमा यस्तो अखाद्य पदार्थ फेला परेको हो । बर्षौ अघिदेखि सो उद्योगको गाडीले नै पसलहरूमा बिक्रीका लागि मिनरल वाटर र जार ल्याइदिने गरेको पसल सञ्चालकहरू बताउँछन् ।

यता, जार उत्पादक हिमधारा कम्पनीका सञ्चालक जितेन्द्र दाहालले भने यो विषयलाई गम्भीर रुपमा लिएनन् । उनले खाना पकाउँदा कपाल पर्नु स्वभाविक भएको तर्क गर्दै आफ्नो बचाउँ गरे ।

यसैबीच, जारमा अखाद्य बस्तु फेला परेको जानकारी पाएपछि सोमबार खाद्य प्रविधि तथा गुण नियन्त्रण डिभिजन कार्यालय धनकुटाका प्रतिनिधिले सञ्चयकोषको कार्यालयमा पुगेर जार निरीक्षण गरेका छन् । जारको सिलप्याक भाँडोभित्र अखाद्य पदार्थ भएको पुष्टि भएकाले जार उत्पादक कम्पनीमाथि कारबाही प्रकृया अघि बढाइने खाद्य प्रविधि तथा गुण नियन्त्रण डिभिजन कार्यालयका खाद्य निरीक्षक सुशील कोइरालाले जानकारी दिए ।

भिडियो हेर्नुहोस्…