सुनसरी । सुनसरीको धरान उप–महानगरपालिका–८ तिनकुने जंगलस्थित कोशी राजमार्गमा सवारी दुर्घटना हुँदा मोटरसाइकलमा सवार एक जनाको मृत्यु भएको छ । मृत्यु हुनेमा इटहरी उप–महानगरपालिका–१७ पकलीकी ४० बर्षीया मिरा देवी साह छन् ।
Advertisement
आज बिहान साढे ९ बजे धरानबाट इटहरीतर्फ जाँदै गरेको को १ त ९१४३ नम्बरको ट्याक्टरलाई पछाडिबाट आइरहेको को १ ख ५४३० नम्बरको बसले ठक्कर दिनुका साथै बिपरित दिशाबाट जादै गरेको प्रदेश–१ –०२–०४० प ६४०५ नम्बरको मोटरसाइकललाई पनि ठक्कर दिएको थियो ।
ठक्करबाट मोटरसाइकल चालक २५ बर्षीय बिमल साह र मोटरसाइकलको पछाडि सवार उनकी आमा मिरा देवी घाइते भएका थिए । उनीहरुलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको थियो । उपचारका क्रममा बिहान ११ बजे मिरा देवीको मृत्यु भएको हो ।
उनका छोरा बिमलको उपचार भइरहेको छ । दुर्घटनाग्रस्त तीनवटै सवारी साधन र बस चालक धरान–१५ का ४२ बर्षीय प्रभु खड्कालाई ईलाका प्रहरी कार्यालय धरानले नियन्त्रणमा लिएको छ ।
