धनकुटामा राससका महाप्रबन्धक राईलाई पत्रकार महासंघले गर्यो सम्मान

धनकुटा । नेपाल पत्रकार महासंघ धनकुटा शाखाले राष्ट्रिय समाचार समितिका नवनियुक्त महाप्रबन्धक सिद्धराज राईलाई आइतवार सम्मान गरेको छ । गृह जिल्ला धनकुटा आइपुगेका राईलाई महासंघको सभाहलमा कार्यक्रम आयोजना गरी सम्मान गरिएको हो ।

कार्यक्रममा पत्रकार महासंघका केन्द्रिय सदस्य सरिता बराइली, जिल्ला अध्यक्ष नगेन्द्र राई, संस्थापक अध्यक्ष सञ्जय सन्तोषी राई लगायतले महाप्रबन्धक राईलाई सम्मानपत्र प्रदान गरी दोसल्ला ओढाएर सम्मानित गरे । कार्यक्रममा पत्रकार महासंघका उपाध्यक्ष बिदुर खवास, महिला उपाध्यक्ष देवकला कार्की, सचिव हरीबहादुर लम्जेल, महासंघका पूर्व सल्लाहकार भेषराज कटेल, रेडियो मकालुका अध्यक्ष सोविस चेम्जोङ्ग लगायत पत्रकारहरुले राईलाई बधाई ज्ञापन गरेका छन् ।

धनकुटाको सहिदभूमि घर भएका राई जिल्लामा लामो समय पत्रकारिता गरेर नेपालको एकमात्र सरकारी समाचार एजेन्सी राससको उच्च पदमा पुगेको भन्दै महासंघले उनलाई सम्मान गरेको हो । नेपाल पत्रकार महासंघका पूर्व केन्द्रिय सदस्य राई मन्त्रीपरिषदको असार ७ गतेको निर्णय अनुसार राससको महाप्रबन्धकमा नियुक्त भएका हुन् । धनकुटाबाट २०५५ सालदेखि पत्रकारिता थालेका राई चार बर्ष अघिदेखि काठमाडौंलाई कार्यक्षेत्र बनाई काम गर्दै आएका छन् ।

प्रेस चौतारी धनकुटाका पूर्व अध्यक्षसमेत रहेका राईलाई यसअघि शुक्रबार प्रेस चौतारी र नेकपा एमाले धनकुटाले पनि सम्मान गरेको थियो ।

यो पनि हेर्नुहोस्…