संगालोखबर 
विराटनगर । विराटनगरमा यही पुस ९ देखि १९ गतेसम्म आयोजना गर्न लागिएको विराट ट्रेड एक्स्पोमा ‘वीटीई स्टार्टअप फेष्ट’ पनि आयोजना गरिने भएको छ । उद्यमशीलता, नवप्रवर्तन र नयाँ सोचलाई प्रवद्र्धन गर्ने उद्देश्यले मोरङ उद्योग वाणिज्य संघको आयोजना तथा आइडिया स्टुडियोसंगको सहकार्यमा स्टार्टअप फेष्ट गर्न लागिएको हो ।
Advertisement
स्टार्टअप फेस्टमा नयाँ व्यवसायिक आइडिया भएका युवा, विद्यार्थी तथा नव–उद्यमीहरूलाई लक्षित गरी आइडिया प्रस्तुतिदेखि व्यवसायिक पिचसम्मको अवसर प्रदान गरिने मोरङ उद्योग व्यापार संघका प्रमुख कार्यकारी अधिकृत भरत शर्माले जानकारी दिए । उनका अनुसार कार्यक्रममा सहभागीहरूले आवश्यक मार्गदर्शन, सशक्त नेटवर्क, क्षमता विकास तथा दीर्घकालीन व्यवसायिक अवसरहरू प्राप्त गर्नेछन् ।
कार्यक्रमको प्रक्रिया अनुसार पुस १० गतेसम्म आइडिया सबमिट गर्न सकिनेछ । पुस ११ मा हुने स्क्रिनिङ तथा लाइभ अडिसनबाट छनोट भएका सहभागीहरूका लागि पुस १३ गते इन्क्युबेशन तथा बुटक्याम्प कार्यक्रम मोरङ उद्योग वाणिज्य संघको समृद्धि हलमा आयोजना गरिनेछ । अन्तिम चरणको फाइनल बिजनेस पिच भने पुस १५ र १६ गते विराट ट्रेड एक्स्पोको सेमिनार हलमा हुनेछ ।
वीटीई स्टार्टअप फेष्टले सहभागीहरूलाई इन्क्युबेशन, स्रोत तथा साधनमा पहुँच, नेटवर्किङ, बजारमा पहिचान र भ्यालिडेसन तथा बजार पहुँचजस्ता महत्वपूर्ण अवसरहरू प्रदान गर्ने आयोजकको भनाई छ । यसले कोशी प्रदेशमा उद्यमशील संस्कृति विकास गर्न महत्वपूर्ण भूमिका खेल्ने अपेक्षा गरिएको छ ।
