सरकार र विप्लव समूहबीच तीन बुँदे सहमति

काठमाडौं । सरकार र नेत्रविक्रम चन्द (विप्लव) नेतृत्वको नेकपाले बिहीबार तीनबुँदे सहमति गरेका छन् । सहमतिपत्रमा सरकारी वार्ता टोलीका संयोजक गृहमन्त्री रामबहादुर थापा र विप्लव समूहको नेकपाका प्रवक्ता खड्गबहादुर विश्वकर्माले हस्ताक्षर गरेका छन् ।

सहमतिमा सरकार र नेकपाबीच राजनीतिक विषयहरुको समाधान संवादको माध्यमबाट गर्ने, सरकारका तर्फबाट लगाइएको विप्लव नेतृत्वको प्रतिबन्ध हटाउने, विप्लव समूहका सम्पूर्ण राजनीतिक क्रियाकलापहरू शान्तिपूर्ण रुपमा सञ्चालन गर्ने, राजनीतिक बन्दीहरुको रिहाइ गर्ने र मुद्दा खारेज गर्ने विषयहरु छन् ।

सहमतिको विस्तृत विवरण भने शुक्रबार विशेष समारोहमा सार्वजनिक गरिने बताइएको छ । बिहीबार बिहानैदेखि दुवै टोली वार्तामा जुटेका थिए ।