कविता: म निशब्द छु

चारैतिर निराशाको बादल
मडारिएर पनि
आफू निस्पट्ट अध्यारोमा
जिउने शक्ति आर्जन गर्दै
जब अस्तित्वको लागि
अस्तित्व संघर्ष गर्छ
तब,
मनभित्रको हुन्डरी
तुफान बनी
मष्तिस्कमा प्रवेश
गर्दा सामिप्यताको खोल ओडेर
आशाको दियो जलाउनेहरु
पराई बन्दा
झुटो मुस्कानको जाल
बिछ्याउनेहरु
अनि सकुनिको पासा फ्याक्नेहरु
प्रेत बनि नाच्न थाल्दा
व्याख्या गर्ने शब्द छैन
त्यसैले त म निशब्द छु ।

Advertisement