फलेवास । कृषि विकास बैंक, कुश्मा शाखामा कार्यरत कर्मचारी विगत चार दिनदेखि बेपत्ता भएका छन् ।
पर्वतको फलेवास नगरपालिका–४ मुडिकुवाका दीपेन्द्र गौडेल असार २२ गतेदेखि बेपत्ता हुनुभएको हो । बुधबार साँझ कार्यालयबाट घर फर्किएर खाना खाएर सुतेका गौडेल बिहीबार बिहान ४ बजेदेखि सम्पर्कमा हुनुहुन्न ।
Advertisement
लामो समयदेखि बैंकमा कार्यरत गौडेल इमान्दार कर्मचारीका रुपमा परिचित रहनुभएको थियो । बैंकमा लेखापाल पदमा कार्यरत उहाँ सम्पर्कविहीन हुनुको कारण भने पत्ता लागिसकेको छैन ।
चार दिनसम्म पनि सम्पर्कमा नआएपछि परिवारले खोजी गरिदिन अपिल गरेका छन् ।
जिल्ला प्रहरी कार्यालय, पर्वतले गौडेल बेपत्ता भएको र खोजी गरिदिने भन्दै कुनै पनि जानकारी र निवेदन नआएको बताएको छ ।
गौडेलका छोरा दिपेश गौडेलले आफ्नो फेसबुक पेजमार्फत आफ्ना पिता दीपेन्द्रशर्मा गौडेलको अवस्था अज्ञात रहेकाले खोजी गरिदिन आग्रह गरेका थिए ।
विगत एक महिनाअघि बेपत्ता भएर कालीगण्डकीमा मृत भेटिएका शिक्षक नारायण पौडेलको घटना सेलाउन नपाउँदै पुनः गौडेल बेपत्ता भएका छन् ।
