देउवाको गृहजिल्लामा माओवादीको साख जोगाउने नेता भन्छन्– सरकार खोज्ने अवस्था अन्त्य गर्छु

जनयुद्धमा जस्तै सहयोग पाएँ, बाचाहरु पूरा गर्छुः भट्ट

अध्यक्ष पद जितिसकेपछि प्रतिक्रिया दिँदै भट्टले जनयुद्धकालमा जस्तै साथ, सहयोग र समर्थन डडेल्धुराको अजयमेरु गाउँपालिकाका मतदाताबाट पाएको बताए । उनले चुनावको बेला आफूले गरेका बाचाहरु पूरा गर्ने प्रतिबद्धता जनाए ।

माओवादी केन्द्र समृद्धि र विकासको नारा सहित चुनावी अभियानमा होमिएको थियो । अजयमेरु गाउँपालिकामा ‘माओवादीको नीति, माओवादी नेतृत्वः समृद्ध अजयमेरु गाउँपालिकाका लागि विकासप्रेमी व्यक्तित्व’ भन्ने मुख्य नारा बनाइएको थियो ।

भट्टले आफ्नो जितसँगै माओवादीका एजेण्डाहरु स्थापित भएको दाबी पनि गरे ।

‘माओवादी केन्द्रले बोकेका एजेण्डाहरु लिएर जनताको माझ गएँ, अनि हाम्रो पार्टीको जित भयो’, उनले भने, ‘जसरी हामीलाई यहाँका जनताले जनयुद्धको बेला सहयोग गरेका थिए, त्यसरी नै स्थानीय चुनावमा पनि माया गरे र हामीले जित्यौं । चुनावमा गरेका सबै बाचाहरु पाँच वर्षभित्र पूरा गर्छौं ।’

‘जनताले सरकार खोज्ने अवस्था अन्त्य गर्छु’

अजयमेरु गाउँपालिकामा खानेपानी, सिंचाइ, विद्यालय, स्वास्थ्य चौकी, विद्युतीकरण र रोजगारी मुख्य समस्या छन् । यी सबै समस्या समाधान गर्न जनताले आफूलाई जिताएको भट्टको निष्कर्ष छ । उनले भने, ‘सरकारले जनता खोज्दै गाउँ-गाउँमा जानुपर्ने हो, जनताले सरकार खोज्ने अवस्था अन्त्य गर्छु ।’

साथै, उनले सरकारी कार्यालयमा टोकन प्रणालीका आधारमा काम-कारबाहीलाई अगाडि बढाउने र सुशासनको क्षेत्रमा क्षतिपूर्ति सहितको नागरिक बडापत्रलाई कडाइका साथ कार्यान्वयन गर्ने योजना सुनाए ।-अनलाइनखबर