रियो डे जेनेरियो, १२ कात्तिक । ब्राजिलको राष्ट्रपतिमा जेयर बोल्सोनारो निर्वाचित हुनुभएको छ । आइतबार सम्पन्न दोस्रो चरणको निर्वाचनमा बोल्सोनारोले ५५ दशमलव १३ प्रतिशत मत प्राप्त गर्नुभएको निर्वाचन आयोगले जनाएको छ ।
Advertisement
विगतमा सैनिक अधिकृत रहिसकेका र उग्र–दक्षिणपन्थी भनेर चिनिएका ६३ वर्षीय बोल्सोनारोका विपक्षी वर्कर्स पार्टीका नेता फर्नान्डो हडाडले ४४ दशमलव ८७ प्रतिशत मत प्राप्त गर्नुभएको छ ।
बोल्सोनारोले आगामी सन् २०१९ को जनवरी १ बाट राष्ट्रपतिको कार्यभार सम्हाल्नुहुनेछ ।
चुनावमा विजयी भएपश्चात फेसबुकबाट प्रत्यक्ष सम्बोधन गर्नुभएका बोल्सोनारोले सबै मिलेर ब्राजिलको भविष्य बदल्ने प्रतिबद्धता व्यक्त गर्नुभयो । गत सेप्टेम्बर ६ मा चुनावी सभामा सहभागी हुँदा बोल्सोनारोमाथि पेटमा छुरा प्रहार गरेपछि उहाँले फेसबुकबाटै चुनावी प्रचार गरिरहनुभएको छ ।
सम्बोधनका क्रममा उहाँले ब्राजिलमा आफूले बाइबल र संविधानलाई सिरोपर गरेर सत्ता सञ्चालन गर्ने बताउनुभयो । उहाँले भन्नुभयो, “हामी बामपन्थीहरुको समाजवाद, साम्यवाद, लोकप्रियतावाद र अतिवादको भ्रममा पर्ने छैनौं ।” तर उहाँले संविधान, प्रजातन्त्र र स्वतन्त्रताको रक्षा गर्ने प्रतिबद्धता व्यक्त गर्नुभयो ।
चुनावी नतिजा आएलगत्तै रियो डे जेनेरियास्थित बोल्सोनारोको घरबाहिर हजारौं समर्थक भेला भएका थिए । उनीहरुले ब्राजिलको झण्डा फहराउनुका साथै पटका पड्काएका थिए ।
ह्वाइट हाउसले अमेरिकी राष्ट्रपति डोनाल्ड ट्रम्पले टेलिफोन गरी बोल्सोनारोलाई बधाई दिनुभएको जनाएको छ । दुबै नेताले आमजनताको जीवनस्तरमा सुधार ल्याउन मिलेर कार्य गर्नेमा बलियो प्रतिबद्धता व्यक्त गर्नुभएको छ– ह्वाइट हाउसका प्रवक्ता सराह स्यान्डर्सले बताउनुभयो ।
दक्षिण अमेरिकामा ट्रम्पका उत्तराधिकारीका रुपमा लिइने बोल्सोनारोले ट्रम्पका नीतिहरुको खुलेर प्रशंसा गर्ने गर्नुहुन्छ ।
अर्कोतर्फ, विपक्षमा पुगेको सत्तारुढ बामपन्थी वर्कर्स पार्टीले प्रतिरोध गर्ने जनाएको छ । चुनावमा पराजित भएलगत्तै हडाडले ४ करोड ५० लाख जनताको स्वतन्त्रताको रक्षाका लागि सङ्घर्ष गर्ने बताउनुभयो । साओ पाउलोमा वर्कर्स पार्टीका कार्यकर्तालाई सम्बोधन गर्दै हडाडले नवनिर्वाचित राष्ट्रपति बोल्सोनारोलाई “फासीवादी” भन्नुभएको थियो ।
महिला, समलिङ्गी र काला जातिमाथि नकारात्मक टिप्पणी गर्न रुचाउने बोल्सोनारोले बामपन्थी विचारधाराका फर्नान्डो हडाडलाई पराजित गर्न सक्ने मत सर्वेक्षणले देखाएका थिए ।
भ्रष्टाचार, कुशासन र हत्याहिंसाका कारण दक्षिण अमेरिकाको सबैभन्दा ठूलो देश ब्राजिलका आमजनतामा चरम नैराश्यता छ । उनीहरु परिवर्तनको पक्षमा उभिएको देखिएको छ ।
राष्ट्रपतिका उम्मेदवार हडाड मात्र होइन उहाँको वर्कर्स पार्टीको छविसमेत पछिल्ला वर्षमा कमजोर भएको छ । हडाडलाई भ्रष्टाचारको आरोपमा हाल जेलमा रहेका पूर्वराष्ट्रपति लुइस इनासियो लुला डी सिल्भाको समर्थन रहेको थियो । लुला सन् २००३ देखि २०१० सम्म ब्राजिलको राष्ट्रपति हुनुहुन्थ्यो ।
लुलाको झैं सशक्त नदेखिएका हडाडले पार्टीलाई एकताबद्ध गराउन सक्नुभएको थिएन । उहाँकै कमजोरीका कारण विपक्षी बोल्सोनारोले मतदातालाई आकर्षित गरेको बताइन्छ । पूर्वसैनिक अधिकृत बोल्सोनारोले सत्ताको बागडोर पाए के गर्लान् भन्ने सर्वत्र चासो र चिन्ता बढेको छ ।
बोल्सोनारोको नारा भने फरक थियो । उहाँ सन् १९६४ देखि १९८५ को अवधिका सैनिक सरकारले गरेको औद्योगिकीकरणलाई मुक्तकण्ठले प्रशंसा गर्नुहुन्छ । विगतका सैनिक सरकारले गरेका सबै कार्यहरुको बोल्सेनारोले स्वागत पनि गर्नुभएको छ ।
बोल्सेनारोले विगतका सैनिक सत्ताले बामपन्थी विद्रोही र उनीहरुका समर्थकलाई हत्या गर्नुको साटो यातना मात्र दिएको बताउने गर्नुभएको छ । उहाँका धारणा र विचारलाई मानिसले बढी रुचाएका छन् ।
ब्राजिलको राष्ट्रपतीय निर्वाचनमा १४ करोड ७० लाख मतदाता रहेका थिए । ब्राजिलमा मतदानलाई बाध्यकारी बनाइएको छ ।
