काठमाडौँ, ८ असोज । प्रधानमन्त्री केपी शर्मा ओलीले इन्द्रजात्राका अवसरमा स्वदेश तथा विदेशमा रहनुभएका सम्पूर्ण नेपालीमा शुभकामना व्यक्त गर्नुभएको छ ।
Advertisement
पौराणिककालका खास घटनामा आधारित भएर शुरु भएका यस्ता चाडपर्व कालान्तरसम्म जीवितै हुनु खुशीको कुरा भएको बताउँदै उहाँले यहाँ सबै जातिका आफ्नै प्रकारका संस्कृति र चाडपर्व सांस्कृतिक सम्पत्ति भएकाले सरकार यस्ता सांस्कृतिक चाडपर्वको संरक्षण र सम्वद्र्धधनमा सकारात्मक रहेको स्पष्ट गर्नुभएको छ ।
प्रधानमन्त्रीले विभिन्न जाति, समुदाय र भूगोलमा बसोबास गर्ने नेपालीले मनाउने चाडपर्वले नेपालीलाई एकताको सूत्रमा बाँधेको उल्लेख गर्दै भन्नुभएको छ, “नेपालको यो एकतालाई धुमिल्याउन विभिन्न तत्वले विगतमा गरेका प्रयासलाई नेपाली जनताले परास्त गरेका छन्, नेपालीहरु जाति, धार्मिक, सांस्कृतिक रुपमा एकताबद्ध छौँ भन्ने सन्देश नेपालीहरुले दिएका छन् । यो हाम्रा लागि गौरवको कुरा हो ।”
वर्तमान सरकार आर्थिक विकास र सृमद्ध नेपाल निर्माणमा प्रतिबद्ध रहेको उल्लेख गर्दै प्रधानमन्त्री ओलीले सरकारको यो अभियानसँग यस प्रकारका सांस्कृतिक महत्व भएका चाडपर्व पनि जोडिन सक्ने बताउनुभयो ।
मौलिक विशेषता भएका यस्ता पर्व विदेशी पर्यटक आकर्षणका लागि महत्वपूर्ण सावित हुन सक्ने भएकाले यिनलाई पर्यटनसँग जोडेर पनि हेर्नु उपयुक्त हुने प्रधानमन्त्रीले सन्देशमा बताउनुभएको छ ।
