नवलपरासी, ६ पुस। नवलपरासी पश्चिमस्थित नेपाल—भारत सीमा क्षेत्रमा नेपाल र भारतका सुरक्षाकर्मीद्वारा संयुक्त सुरक्षा गस्ती गरिएको छ । नवलपरासीमा सीमा सुरक्षाको लागि नेपालको सशस्त्र प्रहरी र भारतको सीमा सुरक्षा बलका सुरक्षाकर्मीले बुधबार संयुक्त गस्ती गरेका हुन् ।
संयुक्त गस्ती टोलीले सीमा स्तम्भ संख्या ५०० देखि स्तम्भ संख्या ४९७ सम्म संयुक्त गस्ती गरिएको सशस्त्र प्रहरी बोर्डर आउट पोष्ट गुठी परसौनीले जनाएको छ । सशस्त्र प्रहरी बोर्डर आउट पोष्ट, गुठी परसौनी र सशस्त्र सीमा बल एसएसबी, झुलनीपुरले संयुक्त गस्ती गरेका थिए ।
Advertisement
सशस्त्र प्रहरी बोर्डर आउट पोष्ट, गुठी परसौनीका सशस्त्र प्रहरी निरीक्षक तेजबहादुर बुढाथोकीको नेतृत्वमा रहेको गस्ती टोली र सशस्त्र सीमा बल एसएसबी, झुलनीपुरको सशस्त्र प्रहरी नायब उपरीक्षक एन चोंगलोइको नेतृत्वमा रहेको टोलीले सीमा क्षेत्रमा संयुक्त गस्ती गरेको थियो ।
सो क्रममा नेपाल—भारत सीमा क्षेत्रमा देखिएको चोरी निकासी, सुरक्षा चुनौती, सुरक्षाको दृष्टिकोणले देखिएको समस्या संयुक्तरुपमा दुवै देशका सुरक्षाकर्मी मिलेर समाधान गर्न छलफलसमेत गरिएको थियो ।
संयुक्त गस्ती टोलीमा सशस्त्र प्रहरीबाट १३ जना, सशस्त्र सीमा बल एसएसबीबाट १० जना र नेपाल प्रहरीबाट आठजना सुरक्षाकर्मीको संयुक्त सहभागिता रहेको थियो ।
