ताप्लेजुङ, २० कात्तिक । ताप्लेजुङका २२ मतदान स्थल सुरक्षाका दृष्टिले अति संवेदनशील रहेको जिल्ला प्रशासन कार्यालयले जनाएको छ ।
Advertisement
जिल्लामा कायम रहेका ७३ मतदान स्थल मध्ये २२ मतदान स्थललाई प्रशासनले अति संवेदनशीलको सूचीमा राखेको प्रमुख जिल्ला अधिकारी मोहन जिसीले जानकारी दिए ।
उनका अनुसार बाँकी २० वटा संवेदनशील र ३१ वटा मतदान केन्द्रलाई सामान्यको सूचीमा राखिएको छ ।
यसैबीच, निर्वाचन आचारसंहिता कार्यान्यवनको पछिल्लो अवस्था बारे छलफल गर्न सोमबार मुख्य निर्वाचन अधिकृतको कार्यालय, ताप्लेजुङले आयोजना गरेको एक कार्यक्रममा अनुमति प्राप्त हतियार निर्वाचन अवधिभर प्रशासनलाई बुझाउन आग्रह गरिएको छ ।
सुरक्षा अवस्थालाइ हेरेर सुरक्षा समितिले सुरक्षा गस्तीको अभियान बढाएको तथा नाका–नाकामा चेकपोष्ट स्थापना गरी सुरक्षा जाँचमा कडाइ गर्न थालिएको प्रजिअ जिसीको भनाइ छ ।
यसअघि भएको स्थानीय तहको निर्वाचनमा जिल्लाभर ५९८ नेपाल प्रहरी, ५१० म्यादी प्रहरी, ३९० नेपाली सेना, ३६३ सशस्त्र प्रहरी र ११ जना राष्ट्रिय अनुसन्धानका सुरक्षाकर्मी सहित १ हजार ८७२ जना सुरक्षाकर्मी परिचालन गरिएको थियो ।
सार्वजनिक स्थलका प्रचार सामग्री हटाउन निर्देशन
मुख्य निर्वाचन अधिकृतको कार्यालय, ताप्लेजुङले सार्वजनिक स्थलमा टाँसिएका पोष्टर र झण्डा निकाल्न राजनीतिक दलहरुलाई निर्देशन दिएको छ ।
अनुमतिबिना निजी घरमा पर्चा, पोष्टर तथा ब्यानर नटास्न समेत कार्यालयले दलहरुलाई सचेत गराएको छ ।
मुख्य निर्वाचन अधिकृत कृपाशुर कार्कीले आचारसंहिता उल्लङ्घन बारे उजुरी प्राप्त हुन थालेको भन्दै दुःख व्यक्त गरे ।
उनले दलहरुलाई तत्काल सार्वजनिक स्थलमा टासिएका प्रचार सामग्रीलाई हटाउने निर्देशन दिँदै भने, ‘अबदेखि आचारसंहिता विपरितका क्रियाकलाप भए, निर्वाचन आयोगले आचारसंहिता उल्लंघन अन्र्तगत गर्ने कारवाही अघि बढाउन बाध्य हुनेछौं ।’
