धनकुटा । एमाले स्थायी कमिटी सदस्य तथा संसदीय दलका उपनेता सुवासचन्द्र नेम्बाङले संविधान संशोधन विधेयक कुनै पनि हालतमा पारित नहुँने दावी गरेका छन ।
देशब्यापी कार्यक्रम अनरुप एमाले धनकुटाले सञ्चालन गरेको चार महिने जनपरिचालन अभियान समापनका अवसरमा सोमवार डाँडाबजारमा अयोजित सभालाई संबोधन गर्दै नेम्वाङले यस्तो वताएका हुन । संविधान संशोधनका पक्षधरको संख्या घट्दै गएको तथा राप्रपालेसमेत विपक्षमा मतदान गर्ने भएकोले विधेयक पारित नहुने उनको भनाई छ ।
Advertisement
सरकारले संबिधान संशोधन बिधेयक अघि बढाएर गलत काम गरेको उनले बताए । ‘काम कुरो एकातिर कुम्लो वोकी ढिमीतिर भनेजस्तै तरिकाले सरकार अघि बढ्दैछ ।’ नेम्वाङले भने ‘अहिलेको प्रमुख आवश्यकता संविधान कार्यान्वयन गर्नु र स्थानीय निर्वाचन गर्नु हो ।’ सरकारले गलत बाटो लिएर अघि बढ्दा समस्या सृजना भएको नेम्वाङको ठम्याई छ ।
आगामी ०७४ माघ भित्र तीन वटै तहको निर्वाचन सम्पन्न हुने भन्दै नेम्वाङले सबै तहको निर्वाचनमा एमालेको जनलहरबाट सत्ता घटक तथा अन्य दल आत्तिएर निर्वाचन नगराउने प्रपञ्चमा लागेको आरोप पनि लगाए । निर्वाचनका लागि एमाले पूर्णरुपमा तयारी अवस्थामा रहेको बताउँदै उनले अन्य दललाई पनि निर्वाचनमा केन्द्रित हुन सुझाव दिए ।
जनताले बनाएको जनमैत्री संविधान कार्यान्वयन गर्नुको विकल्प नभएको भन्दै उनले संबिधानको कार्यान्वन नै अहिलेको प्रमुख आवश्यकता भएको दोहोर्याए । फरक प्रसंगमा नेता नेम्वाङले सत्तामा रहेको मधेसी घटकले स्थानीय निर्वाचनको बिरोध गर्नुको तुक नभएको जिकिर गरे ।
देशको अवस्था जटिल मोडमा रहेकोले एमालेले जिम्मेवार भूमिका निर्वाह गर्न तप्पर रहेको उनले बताए । स्वतन्त्र विद्यार्थीको युनियन निर्वाचनको प्रसंग जोड्दै उनले एमाले निकट विद्यार्थी संगठन अनेरास्ववियुको लहर देखेर अन्य दल तथा तिनका विद्यार्थी संगठनले विभिन्न वहानामा व्यवधान खडा गर्न थालेको आरोप लगाए ।
एमाले भित्र कुनै गुट उपगुट भए त्यसलाई अन्त्य गरी सवै नेता कार्यकर्ता एकजुट भएर स्थानीय चुनावमा केन्द्रित हुन नेम्वाङले आग्रह पनि गरेका छन ।
