संगालोखबर 
विराटनगर । विश्वका चर्चित फुटबलर एवं अर्जेन्टिनाका कप्तान लियोनल मेसी फिफा विश्वकपको गोल्डेन बुट प्राप्त गर्ने दौडको शीर्ष स्थानमा उक्लिएका छन् ।
बिहीबार बिहान अमेरिकाको एटलान्टामा सम्पन्न दोस्रो सेमिफाइनल खेलमा इंग्ल्याण्डविरुद्ध २-१ को रोमाञ्चक पुनरागमन जित निकाल्दै अर्जेन्टिना फाइनलमा प्रवेश गर्दा ३९ वर्षीय मेसीले आफ्नो जादुमयी प्रदर्शनलाई निरन्तरता दिएका हुन् ।
Advertisement
उक्त खेलमा आफैँले गोल गर्न नसके पनि अर्जेन्टिनाले गरेका दुवै गोलमा उत्कृष्ट असिस्ट (गोलका लागि पास) उपलब्ध गराउँदै मेसीले गोल्डेन बुटमा आफ्नो दाबेदारीलाई सबैभन्दा बलियो बनाएका छन् ।
इंग्ल्याण्डविरुद्धको खेलमा थपिएका दुई असिस्टसँगै मेसीले फ्रान्सका कप्तान किलियन एमबाप्पेलाई पछि पारेका हुन् । हालसम्म जारी प्रतियोगिताका ७-७ खेलमा मेसी र एमबाप्पे दुवैले समान ८-८ गोल गरेका छन् ।
तर, फिफाको नियमअनुसार दुई वा दुईभन्दा बढी खेलाडीको गोल सङ्ख्या बराबर भएमा असिस्टको आधारमा विजेताको निर्धारण गरिन्छ । हाल मेसीको नाममा ४ असिस्ट भइसकेको छ भने एमबाप्पेसँग ३ असिस्ट मात्रै छ । यही प्राविधिक नियमका कारण असिस्टमा अगाडि रहँदै मेसी गोल्डेन बुटको दौडमा पहिलो स्थानमा छन् ।
सेमिफाइनलमा स्पेनसँग पराजित भइसकेकाले फ्रान्सका कप्तान एमबाप्पेका लागि अब तेस्रो स्थानका लागि इंग्ल्याण्डविरुद्ध हुने एकमात्र खेल बाँकी छ । एमबाप्पेले उक्त खेलमा गोल वा असिस्ट थपेर मेसीलाई चुनौती दिने अवसर त छ, तर इंग्ल्याण्डमाथि जित निकाल्दै फाइनल पुगेको अर्जेन्टिनाका कप्तान मेसीसँग भने फाइनल जस्तो ठुलो मञ्चमा गोल र असिस्ट दुवै बढाउने स्वर्णिम अवसर अझै सुरक्षित छ ।
गोल्डेन बुटको प्रतिस्पर्धामा रहेका अन्य प्रमुख विश्वचर्चित खेलाडीहरू भने प्रतियोगिताबाट बाहिरिइसकेका छन् । ७ गोल गरेका नर्वेका अर्लिङ हालान्ड यसअघि नै प्रतियोगिताबाट बाहिरिएका थिए भने ६-६ गोल गरेका इंग्ल्याण्डका ह्यारी केन र जुड बेलिङ्घमको यात्रा पनि सेमिफाइनलमै टुङ्गिएको छ ।
त्यस्तै, ५ गोल गरेका फ्रान्सका उसमान डेम्बेले पनि प्रतियोगिताबाट बाहिरिँदा फाइनल पुगेको स्पेनका मिकेल ओयार्जुबाल ५ गोलसहित गोल्डेन बुटको दौडमा सातौँ स्थानमा संघर्षरत छन् । फाइनल भिडन्त नजिकिँदै गर्दा मेसीका सामु विश्वकप उपाधिसँगै व्यक्तिगत रूपमा गोल्डेन बुट समेत चुम्ने ऐतिहासिक अवसर जुरेको छ ।
