संगालोखबर 
विराटनगर । विराटनगरबाट चोरी भएको मोटरसाइकलसहित प्रहरीले एक जनालाई नियन्त्रणमा लिएको छ । मोटरसाइकलको नम्बर प्लेट परिवर्तन गरी चलाइरहेको अवस्थामा भारतको बिहार राज्य, अररिया जिल्ला सोनापुर-९ का २२ वर्षीय मो. सहानुवाजलाई प्रहरीले पक्राउ गरेको हो ।
गत जेठ ७ गते दिउँसो अन्दाजी १२ः३० बजे विराटनगर-११ स्थित महेन्द्र चोकको सडक किनारबाट मोटरसाइकल चोरी भएको थियो । विराटनगर-१४ का रबिन्द्र कुमार यादवले आफ्नो को १९ प ५२०२ नम्बरको मोटरसाइकल हराएपछि मोरङ प्रहरीमा निवेदन दिएका थिए ।
Advertisement
निवेदन दर्ता भएलगत्तै मोरङ तथा मातहतका प्रहरी कार्यालयहरूबाट खोजतलास सुरु भएको थियो । खोजी गर्ने क्रममा जेठ २४ गते दिउँसो अन्दाजी ३ बजे विराटनगर-१७ रानीबाट मोटरसाइकलसहित उनलाई पक्राउ गरिएको मोरङ प्रहरीका सूचना अधिकारी डीएसपी मकेन्द्र कुमार मिश्रले जानकारी दिए ।
पक्राउ परेका व्यक्तिलाई जिल्ला प्रहरी कार्यालय मोरङमा राखिएको छ । उनीमाथि आवश्यक अनुसन्धान भइरहेको प्रहरीले जनाएको छ ।
