धनकुटा । धनकुटामा आजबाट सहिद भीमनारायण गोल्डकप फुटबल प्रतियोगिता सुरु हुँदैछ । टुँडिखेलमा दिउँसो २ बजे प्रतियोगिता उद्घाटन गरिदैछ ।
Advertisement
धनकुटा नगरपालिकाका प्रमुख चिन्तन तामाङले प्रतियोगिता उद्घाटन गर्ने कार्यक्रम तय भएको आयोजकले जनाएको छ । उद्घाटन समारोह पश्चात दिउँसो ३ बजेबाट खेल सुरु हुने प्रचारप्रसार समिति संयोजक विदुर खवासले जानकारी दिए ।
उद्घाटन खेलमा आयोजक टिम धनकुटा र पेमा युवा क्लब विराटनगरबीच खेल हुदैछ । सहिद भिमनारायण स्मृति प्रतिष्ठानले आयोजना गरेको प्रतियोगिता जेठ २ गतेसम्म सञ्चालन हुनेछ । प्रतियोगिताको उपाधिका लागि आठ टिम भिड्दैछन् ।
भारतको सिलिगुडीस्थित कञ्चनजंगा फुटबल क्लब, प्लानिङ ब्वाइज क्लब काठमाण्डौ, राष्ट्रिय जागृती फुटबल क्लब सुनसरी, झापा फुटबल क्लब, एपीएफ काठमाण्डौ र वीरगञ्ज युनाइटेड पनि प्रतियोगितामा सहभागि छन् ।
प्रतियोगिताको विजेताले ५ लाख र उपविजेताले २ लाख ५० हजार पाउने आयोजकले जनाएको छ ।
