धनकुटा, ६ भदौ । तराईका बाढी पीडितको सहयोगार्थ नेपाल तरुण दल धनकुटाले राहत संकलन अभियान संचालन गरेको छ ।
तराईलाई दुख्दा, पहाड रुन्छ भन्ने नारा लेखिएको व्यानरसहित धनकुटा बजारमा बाढी पीडितका लागि संचालन गरिएको राहत संकलन अभियानको क्रममा ६८ हजार ३ सय ६१ रुपैयाँ संकलन भएको नेपाल तरुण दल धनकुटाका अध्यक्ष दिनेश राईले बताए ।
Advertisement
राहत संकलन अभियानको क्रममा दुई बोरा चामल र करिब एक लाख ५० हजार बराबरको लत्ताकपडा र जुत्ता चप्पल पनि संकलन भएको छ ।
उक्त संकलित नगद तथा लत्ताकपडा पूर्वी तराईका झापा, सुनसरी, मोरङ र सप्तरी मध्ये कुनै पनि जिल्लाका बाढी पीडित परिवारलाई वितरण गरिने अध्यक्ष राईले बताए ।
अविरल बर्षाका कारण पूर्वका विभिन्न जिल्लाका ४७ जनाले ज्यान गुमाउनुका साथै १५ जना बेपत्ता भएका थिए ।
त्यस्तै बाढीबाट पुर्वमा ७ जना घाइते, तीन हजार ४ सय ९१ जना घरधुरी र ११ हजार ५ सय ४५ जना विस्थापित भएको पूर्व क्षेत्रीय प्रहरी कार्यालय रानी विराटनगरले जनाएको छ ।
