विराटनगरमा भन्सार छलेर ल्याइएको १२ लाखको कपडा र जुत्ता बरामद

बिराटनगर । भारतवाट भन्सार छलेर ल्याइएको ठूलो परिमाणको सामाग्री प्रहरीले गएराती विराटनगरवाट नियन्त्रणमा लिएको छ । ट्याक्टरमा राखेर ल्याउँदै गरेको अवस्थामा गएराती करिब ८ बजे बिराटनगर महानगरपालिका–१५ बाट प्रहरीले अवैध सामान बरामद गरेको हो ।

१ नम्वर प्रदेश प्रहरी कार्यालय बिराटनगर र जिल्ला प्रहरी कार्यालय मोरङबाट खटिएको संयुक्त प्रहरी टोलीले चेकजाँच गर्ने क्रममा बीआर ३८ ए ३२८७ नम्बरको ट्रयाक्टरमा सामान फेला परेको हो ।

सो ट्याक्टरमा करिब १२ लाख मूल्य बराबरको कपडा, जुत्ता लगायत सामाग्री बरामद भएको जिल्ला प्रहरी कार्यालयले जनाएको छ । भन्सार छलेर ल्याइएको अबैध सामाग्री बरामद भएपछि ट्याक्टर र चालकलाई प्रहरीले नियन्त्रणमा लिएर कारबाही प्रकृया अघि बढाएको छ ।