सुनसरी । धरानस्थित बीपी कोइराला स्वास्थ्य विज्ञान प्रतिष्ठानका पूर्वउपकुलपति प्रा.डा.राजकुमार रौनियारको निधन भएको छ । भारतको कोलकातास्थित एक अस्पतालमा उपचारका क्रममा मंगलबार बिहान ५६ बर्षको उमेरमा रौनियारको निधन भएको हो ।
Advertisement
सुनसरीको दुहबी–५ घर भएका रौनियारलाई उपचारका लागि कोलकाता लगिएको थियो । उनी मधुमेह र उच्च रक्तचापबाट पीडित थिए । सन् १९९३ देखि उनी रेडियोलोजिस्टका रूपमा बीपीमा प्रवेश गरेका थिए । लामो समय रेडियोलोजी विभागको प्रमुख भएर काम गरेका रौनियार प्रतिष्ठानको उपकुलपति बनेका थिए ।
उपकुलपति भएकै बेला उनी भ्रष्टाचार मुद्दामा मुछिएका थिए । उनलाई गत महिना मात्र विशेष अदालतले सफाइ दिएको थियो ।
कोलकाताबाट मंगलबार नै उनको पार्थिव शरिर दुहबीस्थित घर ल्याइदैछ । दुहवीस्थित बुढी खोला किनारमा बुधबार अन्तिम संस्कार गरिने बताइएको छ ।
