धनकुटा । स्थानीय तह निर्वाचनका लागि आज बिहान ७ बजेबाट देशभर मतदान सुरु भएको छ । मतदानका लागि देशभर १० हजार ७५६ मतदानस्थलमा २१ हजार ९५५ मतदान केन्द्र तोकिएको छ ।
देशभर ८९ लाख ९२ हजार १० पुरुष, ८७ लाख ४१ हजार ५३० महिला र १८३ अन्य गरी कूल एक करोड ७७ लाख ३३ हजार ७२३ मतदाता छन् । उनीहरुले ७५३ स्थानीय तहका प्रमुख/उपप्रमख, अध्यक्ष/उपाध्यक्ष, वडाध्यक्ष, दलित महिला सदस्य, महिला सदस्य र खुला वडासदस्य गरी कूल ३५ हजार २२१ जनप्रतिनिधि निर्वाचित गर्न मतदान गर्दैछन् ।
Advertisement
देशभरका छ महानगरपालिका, ११ उपमहानगरपालिका र २७६ नगरपालिकामा २९३ प्रमुख र उपप्रमुख निर्वाचित हुँनेछन् । ४६० गाउँपालिकामा एक/एक जना अध्यक्ष र उपाध्यक्ष, छ हजार ७४३ वडामा वडाध्यक्ष, सोही संख्यामा महिला र दलित महिला सदस्य तथा १३ हजार ४८६ खुला वडा सदस्य निर्वाचित हुने निर्वाचन आयोगले जनाएको छ । निर्वाचनका लागि एक लाख ४५ हजार ११ उम्मेदवार चुनावी मैदानमा छन् ।
अहिले मतदान केन्द्रहरुमा मतदाताहरु मतदानका लागि लामबद्ध रुपमा बसेका छन् । साँझ ५ बजेसम्म मतदान जारी रहने आयोगले जनाएको छ ।
