बुहारीलाई एसिड प्रहार गरेको आरोपमा जेठाजु र ससुरा पक्राउ

बारा । पर्साको वीरगञ्ज महानगरपालिका–१३ की सीता पटेलमाथि एसिड प्रहार गरेको आरोपमा उनका जेठाजु र ससुरा पक्राउ परेका छन् । पक्राउ पर्नेमा वीरगञ्जको श्रीपुरका ३२ वर्षीय जेठाजु रामबाबु साह र ससुरा ५० वर्षीय हवारी साह छन् ।

पटेलमाथि शुक्रबार राती एसिड प्रहार भएको थियो । उमेश साहकी श्रीमती २८ वर्षीया पटेल बाराको कलैयास्थित आफ्नो माइतीघर आउने क्रममा मोटरसाइकलमा आएका दुई जनाले एसिड प्रहार गरेका थिए ।

एसिड प्रहार भएको सूचना पाएपछि तत्काल खटिएको प्रहरी टोलीले घाइते अवस्थामा रहेकी पटेललाई उपचारका लागि प्रादेशिक अस्पताल कलैया पठाएको थियो । सो अस्पतालबाट उनलाई थप उपचारका लागि नारायणी उपक्षेत्रीय अस्पताल वीरगञ्जमा लगेर उपचार भइरहेको प्रहरीले जनाएको छ ।

पटेलले घटनामा जेठाजु र ससुराको संलग्नता रहेको बयान दिएपछि उनीहरुलाई नियन्त्रणमा लिएर थप अनुसन्धान भइरहेको जिल्ला प्रहरी कार्यालय बाराले जनाएको छ