काठमाडौं । काठमाडौं महानगरपालिका–३५ स्थित महादेव स्थानमा शुक्रवार निःशुल्क स्वास्थ्य शिविर सञ्चालन भएको छ । जीवन्त फर्मा केयर एण्ड प्रा.लि.सँगको सहकार्यमा काठमाडौंको सिनामंगलस्थित काठमाडौं मेडिकल कलेजले स्वास्थ्य शिविर सञ्चालन गरेको हो ।
Advertisement
फर्मा परिषरमा सञ्चालन भएको शिविरमा केएमसीका डाक्टरहरुले ९६३ जना बिरामीको स्वास्थ्य परीक्षण गरेका छन् । शिविरमा १९३ जनाको भिडियो एक्सरे, १२१ जनाको ल्याव टेस्ट र ८७ जनाको मुटुको जाँच गरिएको केएमसीका जेनेरल मेनेजर नारायण दाहालले जानकारी दिए ।
जेनेरल मेनेजर दाहालका अनुसार दाँतको समस्या भएर शिविरमा आएका १८ जनाको दाँत फुकालिएको छ भने जटिल प्रकृतिको समस्या भएर शिविरमा उपचार सम्भव नभएका २९ जना बिरामीलाई शल्यक्रियाका लागि अस्पताल रेफर गरिएको छ ।
केएमसीले बिहीवार डल्लेचौरमा शिविर सञ्चालन गरेर ७२१ जना बिरामीको निःशुल्क उपचार गरेको थियो । केएमसी अध्यक्षको जिम्मेवारी सम्हाल्न पूर्वको प्रतिष्ठित नोबेल शिक्षण अस्पतालका सञ्चालकसमेत रहेका डा.सुनिल शर्माको प्रवेश भएसँगै केएमसीले निःशुल्क स्वास्थ्य शिविर सञ्चालनलाई तीव्रता दिएको छ ।
