धनकुटा । भेडेटार नजिक जंगलमा झोलामा पोको पारेर फालिएको अवस्थामा बुधबार साँझ मान्छेको टाउको र खुट्टा फेला परेको छ । भेडेटार–धरान सडक खण्डमा पर्ने जेठामाने गोलाइमा प्लाष्टिकको झोलामा पोको पारेर पालिएको अवस्थामा पुरुषको टाउको र एउटा खुट्टा फेला परेको हो ।
धरानबाट करिब ९ किलोमिटर माथि जंगलमा सडक नजिक मान्छेको टाउको र खुट्टा फेला परेको इलाका प्रहरी कार्यालय धरानका प्रमुख डीएसपी नरेन्द्र कुँवरले संगालोखबरलाई बताए । ‘त्यहाँ पुगेका मान्छेले दुर्गन्ध आएर हेर्दा झोला बाहिर मान्छेको खुट्टा देखेपछि हामीलाई खबर गर्नुभयो, हामी गएर हेर्दा प्लाष्टिकको झोलाभित्र पुरुषको टाउको र एउटा खुट्टा भेटियो,’ संगालोखबरसँग डीएसपी कुँवरले भने, ‘फेला परेको अंगलाई हामीले परीक्षणका लागि घोपामा ल्याएका छौं, घटनाको बिषयमा अनुसन्धान गरिरहेका छौं ।’
Advertisement
साँझ करिब ५ बजे अंग फेला परेको हो । मृतकको शरीर भने फेला परेको छैन । अंग फेला परेपछि प्रहरीले सो स्थानमा तालिम प्राप्त कुकुर लगेर अनुसन्धान थालेको छ । बिपी कोइराला स्वास्थ्य विज्ञान प्रतिष्ठानका फरेन्सी एक्सपोर्ट लगेर अंगहरुको परीक्षण पनि गराइएको डीएसपी कुँवरले जानकारी दिए । फेला परेका अंगहरुलाई अहिले प्रतिष्ठानको शव गृहमा राखिएको छ ।
मृतक को हुन् भन्ने पहिचान खुलेको छैन । हत्या गरेर टुक्रा–टुक्रा गरी सो स्थानमा ल्याएर टाउको र खुट्टा फालिएको हुँनसक्ने प्रहरीको अनुमान छ । शरीर टुक्राएर फाल्नुको कारण खुलेको छैन । मृतकको बाँकी शरीर कहाँ छ पत्तो छैन । प्रहरीले घटनाको बिषयमा अनुसन्धान गरिरहेको छ ।
