धनकुटा, १८ साउन । नेकपा एमालेका सचिव गोकर्ण बिष्टले कांग्रेस र माओवादीले पार्टीगत स्वार्थ पुरा गर्ने उद्धेश्यले राष्ट्रिय स्वाधिनता र स्वतन्त्रतालाई कमजोर बनाउँने गरी संबिधान संशोधन गर्न खोजिरहेको आरोप लगाएका छन ।
धनकुटामा बुधबार प्रेस चौतारी नेपाल प्रदेश नं. १ को बिस्तारित बैठक उद्घाटन कार्यक्रमलाई संबोधन गर्दै सचिव बिष्टले यस्तो बताएका हुन । जनताको नाम वेचेर जनतामाथि नै अन्याय हुँनेगरी कसैको स्वार्थमा ल्याईएको संबिधान संशोधन प्रस्तावलाई एमालेले कुनैपनि हालतमा पास हुन नदिने उनको दावी छ ।
Advertisement
‘संबिधान संशोधन गराएर ५ नम्बर प्रदेशको तराई र पहाडलाई छुट्याउँने, मातृभाषालाई ओझेल पारेर अन्य भाषालाई सरकारी कामकाजको भाषाको मान्यता दिने र स्थानीय तहको अधिकार कटौती गर्ने सड्यन्त्र भईरहेको छ ।’ बिष्टले भने ‘राष्ट्रिय स्वाधिनता र स्वतन्त्रतालाई कमजोर बनाउँने गरी ल्याईएको संबिधान संशोधन प्रस्तावलाई यथा अवस्थामा एमालेले कुनैपनि हालतमा पास हुन दिदैन ।’
अर्को देशको नागरिकता परित्याग नगरी नेपालको नागरिकता पाउँने वातावरण बनाउँन पनि संबिधान संशोधन गर्न खोजिएको उनको आरोप छ । जनताको नाममा संबिधान संशोधनको कुरा उठाएर मधेसका केही पार्टीको स्वार्थ र त्यसैको आधारमा कांग्रेस माओवादीले उठाउँन लागेको फाईदालाई एमालेले भण्डाफोर गर्ने बिष्टले बताए ।
जायज र जनताको हितका बिषयमा संबिधान संशोधन गर्न खोजिए त्यसमा एमाले सहमत हुने भएपनि कसैको नाजायज फाईदाका लागि जनताको हित विपरित काम गर्न एमाले तयार नरहेको सचिव बिष्टको भनाई छ । उनले यो प्रस्तावलाई अविलम्ब फिर्ता लिएर संबिधान संसोधनका लागि आवश्यकता र औचित्यको आधारमा एमालेसँग छलफल गर्न सरकारलाई आग्रह गरेका छन ।
जनताका हक अधिकार र समस्याको समाधान खोज्नका लागि भने एमाले हदैसम्मको लचकता अपनाउँन तयार रहेको उनले बताए । फरक प्रसंगमा एमाले मोर्चा संगठन प्रमुखसमेत रहेका बिष्टले २ नम्बर प्रदेशमा पनि एमाले पहिलो पार्टी बन्ने जिकिर गरेका छन । एमाले बिजयी भएमा मात्र जनताको हित हुने भएकाले जनताले एमालेलाई पहिलो पार्टी बनाउँने उनको भनाई छ ।
कार्यक्रममा प्रेस चौतारीका केन्द्रिय अध्यक्ष गणेश बस्नेतले प्रेस चौतारी कामका हिसावले पत्रकारहरुको पहिलो संगठन भएको दावी गरे । एमाले केन्द्रिय सदस्य जीवन घिमिरेले पत्रकारितालाई ब्यवस्थित र मर्यादित बनाउँन प्रेस चौतारीले भूमिका खेल्नुपर्ने बताए ।
चौतारी महासचिव राजेश राईले पत्रकार महासंघको इतिहासमा दुई कार्यकाल चौतारीले नेतृत्व गर्दा उदाहरणीय काम गरेर देखाउँन सफल भएको जिकिर गरे । बैठकमा १ नम्बर प्रदेशका प्रेस चौतारी सम्वद्ध १ सय ५० भन्दा बढी पत्रकारहरु सहभागि थिए ।
