धनकुटा । आयोजक चुलाचुली युवा क्लवले छथर जोरपाटी गाउँपालिकाको चुलाचुलिमा आयोजित पालिका स्तरीय वालाचतुर्दशी कप फुटबल प्रतियोगिताको उपाधि जितेको छ । शुक्रबार भएको फाइनल खेलमा सिंधुवा बजारको सिंहदेवी क्लवलाई पेनाल्टी सुटआउटमा ४–२ गोल अन्तरले पराजित गर्दै चुलाचुलीले उपाधि जितेको हो ।
निर्धारित समय २/२ गोलको बराबरीमा टुंगियो । थप गरिएको ३ मिनेटमा पनि दुवै टिमबाट गोल हुँन नसकेपछि खेल पेनाल्टी सुटआउटमा धकेलिएको थियो । पेनाल्टीमा सिंहदेवीका उमेश चौधरी र हेमन्त तामाङ गोल गर्न चुक्दा उपाधि चुलाचुलीको पोल्टामा पुगेको हो ।
Advertisement
उपाधिसँगै चुलाचुलीले नगद ४० हजारसहित ट्रफी, मेडल र प्रमाण–पत्र पाएको छ भने उप–बिजेता सिंहदेवीले नगद २५ हजारमा चित्त बुझाएको छ । प्रतियोगितामा चुलाचुलीका सरोज रिजाल हाई स्कोरर, सिंहदेवीका दिवश भुजेल बेष्ट डिफेन्डर, चुलाचुलीका मनिश चौधरी बेष्ट किपर र चुलाचुलीकै समिर लिम्बू उत्कृष्ट खेलाडी घोषित भए ।
बिजयी टिम तथा खेलाडीहरुलाई छथर जोरपाटी गाउँपालिकाका अध्यक्ष शेरबहादुर लिम्बू, एमाले छथर जोरपाटी गाउँ कमिटी अध्यक्ष ईन्द्र सारु मगर, आयोजक क्लवका अध्यक्ष पदम श्रेष्ठ लगायतले पुरस्कृत गरेका छन् । छथर जोरपाटी गाउँपालिकाको आर्थिक सहयोगमा चार दिनसम्म सञ्चालित प्रतियोगितामा पालिकाका १० टिमबीच उपाधिका लागि प्रतिष्पर्धा भएको थियो ।
