धनकुटा । धनकुटाको साँगुरीगढी गाउँपालिका–६ कोलबोटेस्थित कोशी राजमार्गमा गएराती टेम्पुले एक्कासी ब्रेक लगाउँदा दुई जना घाइते भएका छन् । राती करिब साढे १ बजे साँगुरीगढी–६ धारापानीबाट सिम्सुवातर्फ जाँदै गरेको को.१ ह ३१६३ नम्बरको टेम्पुले ब्रेक लगाउँदा टेम्पुमा सवार यात्रु घाइते भएका हुन् ।
घाइते हुँनेमा टेम्पुमा सवार सुनसरीको धरान उपमहानगरपालिका–१६ का ३२ बर्षीय सुजन राई र ३९ बर्षीय राजकुमार राई छन् । धारापानीमा पुजामा पुगेर राती सिम्सुवामा बस्ने गरी जाँदै गर्दा घटना भएको बताइएको छ ।
Advertisement
प्रहरीका अनुसार तिब्र गतिमा हुइकिएको टेम्पुले विपरित दिसाबाट गाडी आउँदा एक्कासी झ्याप्प ब्रेक लगाउँने क्रममा टेम्पुमै ठोक्किएर उनीहरु घाइते भएका हुन् । उनीहरुको टाउको, खुट्टासहित शरिरका बिभिन्न भागमा चोट लागेको छ ।
दुवै घाइतेलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको छ । एक्कासी ब्रेक लगाउँदा टेम्पुको सिसा पनि फुटेको छ । घटनापछि टेम्पुलाई प्रहरीले नियन्त्रणमा लिएको छ ।
