भैरहवा । उम्मेदवारको मृत्यु भएपछि गत बुधबार स्थगित भएको रुपन्देहीको एउटा वडामा आज मतदान भइरहेको छ । अहिले बिहान ७ बजेदेखि त्यस वडामा मतदान भइरहेको छ ।
Advertisement
रुपन्देहीको मर्चवार क्षेत्रमा पर्ने कोटहीमाई गाउँपालिका वडा नम्बर १ मा अहिले मतदान भइरहेको हो ।
वडा नम्बर १ का वडा सदस्यका लागि नेकपा माओवादी केन्द्रका उम्मेदवार मुराली मल्लाहको मृत्यु भएपछि त्यस वडाको मतदान प्रभावित भएको थियो । उनको हृदयघातका कारण मृत्यु भएको बताइएको छ ।
माओवादी केन्द्रले मल्लाहको स्थानमा भोला मल्लाहलाई उम्मेदवार बनाएको छ ।
यस वडामा ४ मतदान केन्द्र रहेका छन् । कोटहीमाई गाउँपालिका दक्षिणी रुपन्देहीको मधेसी बाहुल्य क्षेत्र हो ।
बझाङका दुई मतदान केन्द्रमा पनि आजै मतदान
यस्तै बझाङको दुई मतदान केन्द्रमा पनि आजै पुनः मतदान हुँदैछ ।
बझाङको जय पृथ्वी नगरपालिका वडा नम्बर ३ को ‘क’ र ‘ख’ नम्बरको मतदान केन्द्रमा पुनः मतदान हुन लागेको हो ।
बुधबार मतदानका क्रममा नेकपा एमाले र नेपाली कांग्रेस कार्यकर्ताबीच झडप भएपछि यस केन्द्रको मतदान प्रक्रिया स्थगित भएको थियो । जिल्ला निर्वाचन कार्यालयले त्यस स्थानमा आज पुनः मतदान गराउने निर्णय गरेको हो ।
