बाँके । बाँकेमा गएराती माईक्रोबस दुर्घटना हुँदा १२ जनाको मृत्यु भएको छ । दुर्घटनामा परी २१ जना घाईते भएका छन् । नेपालगञ्जबाट सल्यान जाँदै गरेको ना.५ ख.५९९५ नम्बरको फोर्स माईक्रोबस राप्ती सोनारी गाउँपालिका–२ स्थित ठुरिया जंगलमा गएराती करिव साँढे १२ बजे दुर्घटना भएको हो ।
Advertisement
दुर्घटनामा परी ११ जनाको घटनास्थलमै र एक जनाको उपचारका क्रममा मृत्यु भएको बाँकेका प्रहरी निरीक्षक हृदय सापकोटाले संगालोखबरलाई बताए । उनले भने–‘११ जनाको स्पोर्ट डेथ भएको हो । बिहान एक जनाको उपचारका क्रममा मृत्यु भएको छ । बाँकी २१ जनाको उपचार भईरहेको छ ।’
घाईतेहरुको भेरी अस्पतालमा उपचार भईरहेको छ । उनीहरुमध्ये चार जनाको अवस्था गंभीर रहेको प्रहरीले जनाएको छ । भारतबाट फर्किएका मजदुर सवार माईक्रो दुर्घटनामा परेको हो । २२ जना क्षमताको माईक्रोबसमा करिव ३० जना यात्रु सवार थिए । तीब्र गतिका कारण माईक्रोबस अनियन्त्रित भई रोकिराखेको बा.४ ख.९०६४ नम्बरको ट्रकमा ठोक्किएर दुर्घटना भएको प्रहरीले जनाएको छ ।
