भरत थापा (बिकल्प) 
आफ्नै देशको बरखी बारेर
मौनधारण गरिरहे जस्ता हिमालहरु
राहदानी भिरेर
उडानको पर्खाइमा रहेका नदीहरु
आत्महत्या गर्न
हामफाली रहे जस्ता झरनाहरु
अनि गुँरास कुम्लो पारेर
बसाइ सर्न लागेका पहाडहरु देखेर
म सोधिरहेछु आमालाई
आमा म गोर्खाली हुँ कि हुँइन ?
सोधिरहेछु
कहाँ छ आमा सुस्ता र लिपुलेकको लालपुर्जा ?
किन हडपिरहेछन दलालहरुले?
कहाँ राखेकी छ्यौ आमा बुद्धको जन्मदर्ता ?
किन दाबी गरिरहेछन नाजायज आमाहरु ?
अनि कहाँ छ सगरमाथाको चिनाटिपन ?
कहाँ राखेकी छ्यौ अरुणको नागरिकता
के साच्चै मेरो देशको धनीपुर्जा हराएकै हो आमा ?
कि ऐलानी हो आमा मेरो देश ?
सोधिरहेछु
आफै काल पर्खिरहेको मधेशले
कसरी मेट्ला कर्णालीको अनिकाल ?
अनि कसरी मेट्ला
भरीया र ढाक्रेहरुको प्यास
आफै लिलाम भएको अरुणले
Advertisement
बिन्ती आमा
महिनावारी सुकेको छैन भने
टिष्टा र कांगडासँग संसर्ग गरेर
जन्माइदेउन दुई चार अमर सिंहहरु
मैले पाथिभरा भाकेको छु
जन्माइदेउन एउटा बुद्ध
मैले हलेसी भाकेको छु
अनि जन्माइदेउ भृकुटी र अरनिकोहरु
आमा मैले छिन्ताङ भाकेको छु
छिट्टै पोत्नुछ आमा
सेताम्मे हिमालहरुको क्यानभासमा
रक्ताम्मे गुँरासहरूले स्वाभिमानको रङ्ग
देशको रङ्ग । बिजयको रङ्ग ।
आमा
अब चुपचाप, शान्त बग्ने छैन कोशी
टोलाएर उभिरहने छैन कञ्चनजंघा
बरु रातै हुनेछ सगरमाथा
रातै बग्नेछ दुधकोशी
लडाकु हुनेछन् बुद्ध
तर आत्मसमर्पण गर्नेछैन देश
बरु सहिद हुनेछ ब्रह्माण्डको ।
मलाइ यत्ति भनिदेउ आमा
कहाँ छ बलभद्रहरुले राख्न दिएको
यो देशको धनीपुर्जा
बिर पुर्खाहरुले दर्ता गराएको
गोर्खाली इतिहास
छिट्टै नविकरण गर्नुछ आमा
भन्देउन
कहाँ छ मेरो देशको धनीपुर्जा
कहाँ छ आमा ? कहाँ छ ?
