काठमाडौं, १२ असार । प्रधानमन्त्री केपी शर्मा ओलीले आफ्नो चीन भ्रमणबारे संसदलाई जानकारी गराउँदैछन् । बिहान ११ बजेपछि बस्ने प्रतिनिधिसभा बैठकमा ओलीले चीन भ्रमणबारे जानकारी लगाउन लागेका हुन् ।
Advertisement
ओलीले सोमबार नै संसदमा सम्बोधन गर्ने तयारी गरिए पनि कार्यव्यस्तताको कारण देखाउँदै मंगलबारलाई सारिएको थियो ।
सरकार प्रमुखले विदेश भ्रमण अघि र पछि संसदलाई जानकारी गराउने परम्परा छ । ओली ६ दिने चीन भ्रमण पूरा गरी आइतबार स्वदेश फर्किएका थिए । ओलीको चीन भ्रमणको क्रममा रेलवे लाइन, ऊर्जा, पूर्वाधार निर्माण लगायतका विषयमा सम्झौता भएको छ ।
ओलीले आइतबार नै राष्ट्रपति विद्यादेवी भण्डारीलाई चीन भ्रमणबारे जानकारी गराएका थिए ।
