सरकारलाई बाध्य पारेर निर्बाचन घोषणा गराउँने ओलीको दावी

नेकपा एमालेले बुधवार धनकुटामा आयोजना गरेको कार्यकर्ता भेलालाई संबोधन गर्दै अध्यक्ष ओलीले निर्बाचन चाडै हुने भएकाले तयारीमा जुट्न नेता, कार्यकर्तालाई निर्देशनसमेत दिएका छन । ‘सरकारलाई नत्थी लगाएरै भएपनि एमालेले निर्बाचनको घोषणा गराएरै छाड्छ ।’ ओलीले भने ‘अव तपाईहरु गाउँ–गाउँबाट चुनावको तयारीमा जुट्नुहोस् ।’ संबैधानिक र राजनीतिक संकटबाट बचेर देश विकासका लागि चुनावको बिकल्प नभएको ओलीको तर्क छ ।

Advertisement

फरक प्रसंगमा ओलीले जनताको नाम वेचेर केही राजनीतिक भरिया र दलालहरुले देशलाई बिखण्डन तर्फ लैजाने सड्यन्त्र अनरुप संबिधान संशोधनको कुरा उठाईरहेको आरोप लगाए । तराई र पहाडलाई अलग गराएर ५ नम्बर प्रदेशबाट देश बिखण्डन सुरु गर्न खोजिएको भन्दै ओलीले एमालेले त्यो सड्यन्त्रलाई कुनैपनि हालतमा पुरा हुन नदिने ठोकुवासमेत गरेका छन । ‘अहिले ५ नम्बर टुक्राउँने कुरा भईरहेको छ, त्यो पछि अव १ नम्बर टुक्राउँने कुरा उठाउछन ।’ ओलीले भने ‘कसैको ईच्छाको भरमा देशलाई बिखण्डन गर्ने कामको हामी खरो प्रतिवाद गछौ ।’

देशलाई छिमेकी राष्ट्रले किच्दासम्म पनि ऐया नभन्ने चलन चलिआएको भएपनि त्यसलाई तोडेर देशलाई थिचोमिचो गर्न खोज्ने छिमेकीलाई धपाएर एमालेले राष्ट्रियतालाई उच्च राखेको ओलीको भनाई छ । पूर्व प्रधानमन्त्रीसमेत रहेका ओलीले देशमा अफ्ठेरो परिस्थिती आईपर्दा पनि छिमेकीसँग नझुकेको भन्दै अव पनि देशको सिर निहुराउँन नदिने दावी गरेका छन ।

अन्य दलहरुले एमालेमा उर्लिएको जनलहरको डाहा गरेर एमालेको बिरुद्धमा जनतालाई भड्काउँने कोसिस गरिरहेको भएपनि जनहितमा काम गर्ने पार्टीको रुपमा स्थापित भएकाले एमालेमा जनलहर बढेको ओलीको भनाई छ ।

सय भन्दा बढी ब्यात्ति एमालेमा प्रवेश

यसैवीच उक्त कार्यक्रममा काग्रेस, माओवादी लगायत पार्टी परित्याग गरी सय भन्दा बढी ब्याक्ति एमालेमा प्रवेश गरेका छन । पूर्व एसएस्पी रेवत बहादुर थापाको नेतृत्वमा दुई दर्जन बढी पूर्व प्रहरीहरु एमालेमा प्रवेश गरेका थिए । त्यस्तै काग्रेसका नेता एवं स्थानीय शान्ति समिति धनकुटाका संयोजक लालचन्द्र गोङ्वालगायत पनि एमालेमा प्रवेश गरेका छन । उनिहरुलाई एमाले अध्यक्ष ओलीले पार्टीमा स्वागत गरेका थिए ।

धनकुटालाई प्रान्तिय राजधानी माग

यता नेकपा एमाले धनकुटाले १ नम्बर प्रदेशको राजधानी धनकुटालाई बनाउँन माग गर्दै एमाले अध्यक्ष ओलीलाई मागपत्र बुझाएको छ । एमाले जिल्ला अध्यक्ष राजेन्द्र राईले मागपत्र बुझाउँदै हरेक हिसावले उपयुक्त रहेकाले धनकुटालाईनै प्रादेशिक राजधानी बनाउँन पहलका लागि ओली समक्ष माग गरेका हुन ।