विराटनगर, २४ माघ । प्रदेश नं १ बाट राष्ट्रियसभाका दुई सदस्यका लागि भएको निर्वाचनमा दुवैमा नेकपा एमालेका उम्मेदवार विजयी भएका छन् ।
आज सम्पन्न मतगणनामा दलित समूहबाट एमालेका खेमराज नेपालीले छ हजार २७० मत प्राप्त गरी विजयी भए । उनका निकटम प्रतिद्वन्द्वीे नेपाली काँग्रेसका विनयकुमार विश्वकर्माले दुई हजार २ सय ३२ मत प्राप्त गरेका प्रदेश नं १ का सहायक निर्वाचन अधिकृत नवराज दुलालले जानकारी दिए ।
Advertisement
यस्तै, अल्पसंख्यक समूहबाट एमालेकै अगमप्रसाद बान्तवा विजयी भए । बान्तवाले ६ हजार १ सय ३८ मत प्राप्त गरी विजयी भए भने नेपाली काँग्रेसका महेश जाजुले दुई हजार ८९८ मत प्राप्त गरेका थिए ।
यसअघि, महिलाको तीन पद र खुल्लाको तीन पदमा निर्विरोध निर्वाचित भइसकेका छन् । कूल आठ स्थानमा एमालेका पाँच, काँग्रेसका दुई र नेकपा (माओवादी केन्द्र) को एकजना निर्वाचित भएका छन् ।
यसअघि निर्विरोध निर्वाचित हुनेमा खुल्ला समूहबाट एमालेका पर्शुराम मेघी गुरुङ, हरिचरण शिवाकोटी र काँग्रेसबाट रमेशजंग रायमाझी रहेका छन् । त्यस्तै, महिला समूहबाट एमालेका नैनकला ओझा, माओवादी केन्द्रका विना पोखरेल र काँग्रेसका सरिता प्रसाईं रहेकी छन् ।
