काठमाडौं, १३ माघ। राष्ट्रिय सभा निर्वाचनका लागि शुक्रबारदेखि आचारसंहिता लागू भएको छ । अब सरकारले दीर्घकालीन प्रभाव पार्ने कार्यक्रम सुरु गर्न, कर्मचारी सरुवा–बढुवा र नियुक्ति गर्न पाउनेछैन । प्रमुख आयुक्त डा. अयोधीप्रसाद यादवले आचारसंहिता कार्यान्वयनमा सहयोग गर्न सरकार र अन्य सबै पक्षलाई आग्रह गरेका छन् ।
Advertisement
मत बदर कम गर्न अभियान
निर्वाचन आयोगले मतदाता शिक्षा अभियान सुरु गरेको छ । राष्ट्रिय सभा निर्वाचनमा मतदान गर्ने प्रदेश सभा सदस्य, स्थानीय तहका प्रमुख र उपप्रमुखलाई मतदान गर्दा मतपत्रमा गरिने संकेतबारे जानकारी गराउन अभियानमा खटिएका कर्मचारीलाई प्रमुख आयुक्त डा. यादवले निर्देशन दिएका छन् ।
अन्तिम नामावली १५ माघमा
राष्ट्रिय सभा निर्वाचन कार्यक्रमअनुसार १५ माघमा राष्ट्रिय सभा सदस्यका उम्मेदवारको अन्तिम नामावली प्रकाशन गरिनेछ ।
शुक्रबारसम्म उम्मेदवारको विरोधमा उजुरी दिने समय थियो । त्यस्तै १४ माघमा उम्मेदवारी फिर्ता लिने कार्यतालिका छ । अन्तिम नामावली प्रकाशनसँगै १५ माघमै उम्मेदवारलाई निर्वाचन चिह्न प्रदान गरिनेछ ।
