काठमाडौं, २६ मंसिर । निर्वाचन आयोगले प्रतिनिधिसभा र प्रदेशसभाको निर्वाचन सम्पन्न गराउन नेपाल सरकारले खेलेको भूमिका गर्व गर्नलायक रहेको बताएको छ।
Advertisement
प्रमुख निर्वाचन आयुक्त डा. अयोधीप्रसाद यादवले सुरक्षा चुनौतीका बीच पनि आम मतदातालाई सुरक्षाको पूर्ण प्रत्याभूति गराएर प्रतिनिधिसभा र प्रदेशसभा निर्वाचन सफलतापूर्वक सम्पन्न गराउने नेपाल सरकारको भूमिका गर्व गर्न लायक रहेको बताएका हुन्।
मंगलबार निर्वाचन पर्यवेक्षकहरूको निर्वाचनसम्बन्धी समीक्षा कार्यक्रममा बोल्दै उनले निर्वाचनमार्फत् आम नेपाली जनताले लोकतन्त्र, संघीयता र संविधान कार्यान्वयनमा देखाएको चासोप्रति आभार व्यक्त गरे।
पहिलो चरणको प्रतिनिधिसभा र प्रदेशसभा निर्वाचनमा ६५ प्रतिशत र दोस्रो चरणको निर्वाचनमा ६८ दशमलव २ प्रतिशत मत खसेको जानकारी उनले दिए। प्रमुख निर्वाचन आयुक्त यादवले दुवै चरणको निर्वाचनमा आम मतदाताको उल्लेख्य सहभागिता रहेको दाबीसमेत गरे।
