सुनसरीमा कांग्रेसको सभास्थलनजिकै बम विस्फोट,नाबालकसहित ३ घाइते

सुनसरी, १४ मंसिर । सुनसरीको इटहरी उपमहानगरपालिका–९ भलाद्मीटोलमा बिहीबार अज्ञात समुहले गराएको बम विस्फोटमा परी एक नाबालकसहित ३ जना घाइते भएका छन्। घाइते हुनेमा धनबहादुर श्रेष्ठ, समृना अधिकारी र एक वर्षिय बालक यौवन न्यौपाने रहेका छन्।

घाइतेमध्ये बालकको अवस्था गम्भीर रहेको र तीनै जनाको अहिले धरानमा रहेको विपी कोइराला स्वास्थ्य विज्ञान प्रतिष्ठानमा उपचार भइरहेको छ। नेपाली कांग्रेसले आयोजना गरेको चुनावी सभाको मन्च नजिकै दिउँसो १२ बजे सुतली बम विस्फोट भएको हो।