रुकुम, ४ मंसिर । रुकुम पश्चिममा भरुवा बन्दुकसहित एक अफिम कारोबारी पक्राउ परेका छन्। लागूऔषध अफिम मुद्दाका फरार प्रतिवादी रुकुम पश्चिम मुसिकोट नगरपालिका वडा नं. ८ खाबाङखानीका ४० वर्षीय हिमबहादुर पाण्डे पक्राउ परेका हुन्।
आफ्नो घरमा लागूऔषध अफिम लुकाई राखेको छ भन्ने प्रहरीलाई प्राप्त गोप्य सूचनाका आधारमा प्रहरी कार्यालयबाट प्रहरी निरीक्षक लक्ष्मण वलीको कमाण्डमा खटिएको प्रहरी टोलीले पाण्डेलाई घरमै सुतिरहेको अवस्थामा पक्राउ गरी लागूऔषध अफिम र भरुवा बन्दुक बरामद गरेको हो।
उनको घरमा खानतलासी गर्दा १७ किलो लागूऔषध अफिमका साथै एक थान भरुवा बन्दुक र त्यसमा प्रयोग हुने बारुद, गोली र छर्रा, एक थान खुकुरी बरामद गरिएको पश्चिम रुकुमका प्रहरी नायव उपरीक्षक राजेन्द्रप्रसाद धमलाले जानकारी दिए। उनका अनुसार पाण्डेलाई लागूऔषध कारोबारसम्बन्धी मुद्दा तथा हातहतियार खरखजनासम्बन्धी मुद्दामा अनुसन्धान गर्न जिल्ला अदालतबाट म्याद लिइएको छ।
