धनगढी, ३० कात्तिक । प्रधानमन्त्री शेरबहादुर देउवाले आफू सात पटक प्रधानमन्त्री हुने भविष्यवाणी ज्योतिषले गरेको हुँदा अझै तीन पटक प्रधानमन्त्री हुने बताएका छन्।
Advertisement
एमाले अध्यक्ष केपी ओलीले ‘कांग्रेसको अन्तिम प्रधानमन्त्री’ भनेको विषयप्रति टिप्पणी गर्दै कैलालीको धनगढीमा देउवाले यस्तो बताएका हुन्।
‘ज्योतिषले मलाई सात पटक प्रधानमन्त्री हुने भनेका छन्,’ धनगढीमा आयोजित पत्रकार सम्मेलनमा देउवाले भने, ‘म अझै तीन पटक प्रधानमन्त्री हुन्छु। कम्युनिष्टहरुले भनेर हुन्छ?’
गत जेठ महिनामा देउवा चौथो पटक देशको प्रधानमन्त्री निर्वाचित भएका थिए।
‘यो क्षेत्रबाट प्रधानमन्त्री हुनसक्ने अरु कोही छैन, प्रधानमन्त्री हुने म नै हुँ, त्यसैले यो क्षेत्रका जनताले कांग्रेसलाई विजयी बनाउने छन्,’ उनले थपे।
देउवाले प्रदेश ७ मा कांग्रेसले सबैजसो सिट जित्ने दाबी गर्दै मतदातालाई आफ्नो समस्या सुनाउन पनि आग्रह गरे।
‘म तपाईंहरुको घरको मान्छे हुँ, जुनबेला पनि मलाई भेटेर समस्या सुनाउने, गाली गर्ने अधिकार तपाईंहरुसँग छ,’ उनले भने।-नेपालखबर
