संगालोखबर 
विराटनगर । उद्योग संगठन मोरङले आगामी आर्थिक वर्षको मौद्रिक नीतिका सन्दर्भमा सुझाव प्रस्तुत गर्न अन्तरक्रिया गरेको छ । उद्योगी/व्यवसायी, बैंकिङ क्षेत्रका प्रतिनिधिहरू, चार्टर्ड एकाउन्टेन्ट तथा अर्थतन्त्रसँग सम्बन्धित विभिन्न सरोकारवाला पक्षहरूको सहभागितामा छलफल गरेको हो ।
कार्यक्रममा सहभागीहरूले वर्तमान आर्थिक अवस्थाको समीक्षा गर्दै बैंकिङ प्रणालीमा रहेको अधिक तरलताको प्रभावकारी व्यवस्थापन गरी समग्र अर्थतन्त्रलाई चलायमान बनाउने दिशामा आगामी मौद्रिक नीति केन्द्रित हुनुपर्ने धारणा व्यक्त गरेका थिए ।
Advertisement
कार्यक्रममा उद्योग संगठन मोरङका अध्यक्ष नन्दकिशोर राठीले अर्थतन्त्रको पुनरुत्थानका लागि लगानीमैत्री वातावरण निर्माण, उत्पादनशील क्षेत्रमा कर्जा प्रवाहलाई प्रोत्साहन तथा व्यवसाय सञ्चालनमा लागत घटाएर निजी क्षेत्रको आत्मविश्वास पुनःस्थापित गर्नुपर्ने आवश्यकता औँल्याए ।
उनले आगामी मौद्रिक नीति केवल मुद्रा व्यवस्थापनको दस्तावेज मात्र नभई आर्थिक पुनरुत्थानको महत्वपूर्ण माध्यमका रूपमा आउनुपर्ने धारणा राखे । संगठनका निवर्तमान अध्यक्ष राकेश सुरानाले पुनर्कर्जा तथा कर्जा पुनर्संरचना सम्बन्धी व्यवस्थामा व्यावहारिक सुधार गरी व्यवसायीलाई पुनः लगानीका लागि उत्प्रेरित गर्ने खालको नीति आउनुपर्नेमा जोड दिए ।
संगठनका उपाध्यक्ष सुरेन्द्र गोल्छाले आगामी मौद्रिक नीतिले सरकारद्वारा प्रस्तुत बजेटका सकारात्मक पक्षहरूको कार्यान्वयनमा सहयोग पुर्याउँदै निजी क्षेत्रको मनोबल उकास्ने र आर्थिक गतिविधिलाई गति दिने दिशामा केन्द्रित हुनुपर्ने धारणा राखे ।
बैंकर सुलभहरि जोशीले व्यावसायिक अनुशासन र वित्तीय स्वच्छता कायम गर्न उधारो उठाउने सम्बन्धी स्पष्ट कानुनी व्यवस्था आवश्यक रहेको औल्याउँदै उधारो असुली सम्बन्धी छुट्टै कानुन ल्याउनुपर्ने सुझाव दिए ।
चार्टर्ड एकाउन्टेन्ट अश्वनी वंशलले बैंकिङ प्रणालीमा रहेको अधिक तरलतालाई उत्पादनशील क्षेत्रमा कसरी परिचालन गर्ने भन्ने विषयमा मौद्रिक नीति केन्द्रित हुनुपर्ने बताए । उनले चालु पुँजी कर्जासम्बन्धी व्यवस्थालाई थप लचिलो बनाउदै ७० प्रतिशतसम्म कर्जा प्रवाहको व्यवस्था गर्नुपर्ने धारणा राखे ।
बैंकर दिनेशकुमार पोखरेलले उद्योग/सेवा, कृषि उत्पादन तथा प्रशोधन क्षेत्रमा नयां उद्योगको स्थापनाका साथै विद्यमान उद्योगहरूको उत्पादन वृद्धिका लागि व्यवसायहरूलाई कम्तिमा ५ वर्षसम्म आधार दरमा अधिकतम २ प्रतिशतसम्मको स्थिर ब्याजदरमा कर्जा प्रवाहको व्यवस्था हुनुपर्ने सुझाव दिए ।
त्यसैगरी, बैंकर बद्रि कटवालले मौद्रिक नीतिले निजी क्षेत्रका आर्थिक गतिविधिलाई मार्गदर्शन गर्न महत्वपूर्ण भूमिका निर्वाह गर्ने भएकाले नीति निर्माणका क्रममा व्यावहारिक पक्ष, तथ्यांकमा आधारित विश्लेषण तथा विभिन्न क्षेत्रगत आवश्यकतालाई प्राथमिकता दिनुपर्ने बताए ।
