जबसम्म सरकार जिम्मेवार हुँदैन, हामी पछि हट्दैनौँ : हर्क साम्पाङ

काठमाडौं । श्रम संस्कृति पार्टीका अध्यक्ष हर्क साम्पाङले सरकार जिम्मेवार नभएसम्म आफूहरू पछि नहट्ने बताएका छन् । प्रतिनिधिसभा बैठकबाट बाहिर निस्किएपछि सञ्चारकर्मीहरूसँग कुरा गर्दै साम्पाङले सरकारलाई सदनप्रति जिम्मेवार बनाउन आफूहरूले कोसिस गरिरहेको बताए ।

उनले संसद बैठकमा पर्चा देखाएर गरेको प्रदर्शन जारी राख्ने उल्लेख गरे । आज पनि प्रतिनिधिसभा बैठकमा श्रम संस्कृति पार्टीका सांसदहरूले पर्चा देखाएर विरोध जनाएका थिए । सभामुखले उनीहरूलाई आइन्दा यस्तो व्यवहार नगर्न चेतावनी दिए । तर साम्पाङले विरोध जारी राख्ने बताएका हुन् ।

‘जबसम्म सरकार जिम्मेवार हुँदैन, हामी पछि हट्दैनौँ’, उनले भने, ‘हाम्रो विरोध पाँच वर्ष नै चल्छ ।’ आफूहरूले सुकुमबासी, लिपुलेक, विदेशी ऋणलगायत विषयमा प्रश्न सोधेको तर मन्त्रीहरूले जवाफ नदिएको उनले बताए ।

मन्त्रीहरू आए पनि प्रश्न गर्न नपाएको उनको गुनासो छ । सभामुखले नै प्रश्न गर्न नपाउने भनेर रुलिङ गरेपछि आफूहरूले विरोध गरेको उनले बताए । सभामुखले सबै दलहरूको अभिभावको रूपमा भूमिका निभाउनुपर्नेमा साम्पाङले जोड दिए ।