छोरीहरूलाई विष खुवाएर मारेको अस्मिताको स्वीकारोक्ति

विराटनगर । मोरङको सुन्दरहरैँचाकी अस्मिता पौडेल कार्कीले छोरीहरूलाई विष खुवाएर मारेको स्वीकार गरेकी छन् । सुन्दरहरैँचा-७ स्थित केराघारीमा छोरीहरू एक वर्षीया आइङ्का र तीन वर्षकी अर्पना मृत फेला परेको चार दिनपछि आज बिहान पक्राउ परेकी उनले विष खुवाएर हत्या गरेको प्रहरी समक्ष स्वीकार गरेकी हुन् ।

झापाको बिर्तामोडबाट पक्राउ गरेर ल्याइएकी अस्मितालाई जिल्ला प्रहरी कार्यालय मोरङले आज पत्रकार सम्मेलनमार्फत सार्वजनिक गरेको हो । निर्माणाधीन घरमा पानी लगाउने विषयमा श्रीमान अर्जुन कार्कीसँग विवाद भएपछि दुई छोरी लिएर अस्मिता गत शुक्रबार घरबाट निस्किएकी थिइन् ।

उनले सोही दिन छोरीहरूलाई विष खुवाएर आफूले पनि विष सेवन गरेको प्रारम्भिक अनुसन्धानबाट खुलेको मोरङ प्रहरीका प्रवक्ता डीएसपी ज्ञानेन्द्र बहादुर बस्नेतले जानकारी दिए ।

उनका अनुसार श्रीमान श्रीमतीबीच बारम्बार घरायसी झगडा हुने गरेको समेत खुलेको छ । मोरङ जिल्ला अदालतबाट चार दिनको म्याद थप गरी प्रहरीले थप अनुसन्धान अगाडि बढाएको छ । धनकुटाको पाख्रिबास नगरपालिका-५ घर भएका उनीहरू सुन्दरहरैँचा नगरपालिका-७ स्थित मालती टोलमा बस्दै आएका थिए ।