हेमराज ढकाल
कर्णालीका आँशुले फेरि कर्णालीलाई नै बगाएको छ
भोको पेटलाई खाली हुन पखालाले सघाएको छ
Advertisement
यार्सागुम्बा र स्याउ बेचिएको गाउँ आज पनि रित्तो छ
परदेशमा सन्तान बेच्ने राजधानी चैँ अघाएको छ
शासन र सत्ताले दिएन नागरिकलाई बाँच्न यहाँ
मृत्यु स्वीकारेर बाकसमा, देशले गुन लगाएको छ
अझै पनि एम्बुलेन्स नपाएर सुत्केरी मर्ने देशमा
बरु सरकारले ऋणमा शव–वाहन मगाएको छ
कैयौं जीवनहरू तुइनमा पासो लागेर मर्दै गर्दा
कम्रेडलाई जहाजमा राज्यले छिमेक भगाएको छ
तिम्रा आन्दोलनले ल्याएको परिवर्तनमा प्रश्न राख्दै
गाउँको सिंहदरबारमा अर्काे विचार जगाएको छ
–अरुण गाउँपालिका, भोजपुर
