कोशीका विभिन्न क्षेत्रमा आज पानी पर्ने सम्भावना

विराटनगर । मनसुन नजिकिएसँगै कोशी प्रदेशका विभिन्न स्थानमा वर्षा भइरहेको छ । शुक्रबार कतिपय स्थानमा चट्याङसहित वर्षा हुने जल तथा मौसम विज्ञान विभागले जनाएको छ । बिहीबार कोशीका विभिन्न क्षेत्रमा वर्षा भएको थियो । हावाहुरी पनि आएर मौसममा फेरबदल भएको थियो ।

नेपालमा स्थानीय र पश्चिमी वायुको आंशिक प्रभावसँगै भारतको बिहार आसपास रहेको न्यून चापीय प्रणालीको पनि आंशिक प्रभाव रहेको मौसम पूर्वानुमान महाशाखाले जनाएको छ ।

त्यसैको प्रभावले कोशी, मधेस र बागमती प्रदेशमा सामान्य बदली रही बाँकी भूभागमा आंशिक बदलीदेखि मौसम मुख्यतया सफा रहेको महाशाखाले जनाएको छ । आज दिउँसो कोशी, मधेस, बागमती र गण्डकी प्रदेशलगायत देशको पहाडी भूभागमा आंशिकदेखि साधरणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ ।

कोशी, बागमती र गण्डकी प्रदेशका थोरै स्थानहरू तथा मधेस र लुम्बिनी प्रदेशका पहाडी भूभागका एक–दुई स्थानमा चट्याङसहित हल्का वर्षाको सम्भावना रहेको छ । कोशी, बागमती र गण्डकी प्रदेशका उच्च पहाडी तथा हिमाली भूभागका एक–दुई स्थानमा हल्का हिमपातको सम्भावना रहेको विभागले जनाएको छ ।