विराटनगर । विराटनगर महानगरपालिका–७ सातघुम्तीस्थित कवाडी गोदाममा आज दिउँसो आगलागी हुँदा जलेर एक जनाको मृत्यु भएको छ । ४ जना घाइते भएका छन् ।
Advertisement
कर्कटपाताको छानो भएको कवाडी पसलमा दिउँसो २ः१५ बजेतिर आगलागी सुरु भएको थियो । आगलागीमा परेर पाँच जना घाइते भएका थिए । घाइतेमध्ये एक जनाको उपचारका क्रममा विराटनगरको न्युरो अस्पतालमा मृत्यु भएको प्रहरीले जनाएको छ । मृतकको पहिचान खुल्न बाँकी छ ।
घाइतेमध्ये ३ जना अजिता सरदार, सुशीला पासवान, पिंकी कामतको न्युरोमा र किशोर कामतको कोशी अस्पतालमा उपचार भइरहेको छ । दुई घाइतेको अवस्था गम्भीर रहेको प्रहरीले जनाएको छ ।
मृतक र घाइते कवाडी गोदामकै कामदार हुन् ।
उद्धारकर्ताहरूका अनुसार आगलागी भइरहेको गोदामभित्र एक जना मानिस जलिरहेको देख्न सकिन्छ । तर, आगो नियन्त्रणमा नआएकाले उद्धार गर्न सकिएको छैन ।
विभिन्न ठाउँबाट आएका दमकल, प्रहरी र स्थानीयवासीले आगो नियन्त्रणको प्रयास गरिरहेका छन् । आगलागीको कारण खुल्न बाँकी छ ।
