धनकुटा । धनकुटा नगरपालिका–६ कोल्डस्टोरका बेलबहादुर राई आज बिहान मृत फेला परेका छन् । स्थानीय फोक्लेण्डटापुस्थित सडक तल्तिर खोल्सीमा ४२ वर्षीय राईको शव फेला परेको हो ।
Advertisement
बिहान करिब ९ः३० बजे स्थानीयवासीले खोल्सीमा शव भेटेका हुन् । हिजो साँझ नै घरबाट निस्किएका उनी नफर्किएपछि खोजी भइरहेको थियो । शव भेटिएको खबर पाएपछि पुगेको प्रहरी टोलीले मुचुल्का गरेर शवलाई पोस्टमार्टमका लागि जिल्ला अस्पताल ल्याएको छ ।
उनको मृत्युको कारण खुलेको छैन । बाटो हिड्ने क्रममा लडेर खोल्सीमा खसेको हुनसक्ने प्रहरीको अनुमान छ ।
वैदेशिक रोजगारीबाट फर्किएका राई केही समययता गाउँमै बस्दै आएका थिए । उनका श्रीमतीसहित एक छोरा र एक छोरी छन् । उनकी आमाको पनि दुई महिना अघि मृत्यु भएको थियो ।
