चौबिसे समाजद्वारा काठमाडौंमा साङ्गीतिक साँझ

काठमाडौं । धनकुटाको चौबिसे घर भई काठमाडौंमा बसोवास गर्दै आएकाहरूको संस्था चौबिसे समाज धनकुटाले आज साँझ काठमाडौंमा साङ्गीतिक कार्यक्रम गरेको छ । क्यान्सर पीडित र मृगौला पीडित असहाय बिरामीहरूको उपचार सहयोगार्थ ‘तुलसी पराजुली साङ्गीतिक साँझ’ गरिएको हो ।

कमलादीस्थित नेपाल प्रज्ञा भवनमा आयोजित कार्यक्रममा धनकुटेली गायक पराजुलीले करिब डेढ दर्जन गीत गाएर साङ्गीतिक मनोरञ्जन प्रदान गरे । कार्यक्रममा सहभागीहरू पराजुलीको गीतमा झुमेका थिए । उनीहरूले गीतसँगै नाचेर मनोरञ्जन लिए ।

कार्यक्रममा गायिका प्रविशा अधिकारी, खुशी थुलुङ र दिपा सुहाङले पनि गीत गाएर माहोल तताए । हास्य कलाकार राजा राजेन्द्र पोख्रेलको प्रस्तुतिमा दर्शकहरूले थप मनोरञ्जन लिए ।

असहाय बिरामीहरूको उपचारका लागि चौबिसे समाजले उपचार कोष निर्माण गर्ने योजना बनाएको छ । सो कोषमार्फत विशेष गरी धनकुटाका बिरामीहरूको उपचारमा सहयोग गरिने चौबिसे समाजका अध्यक्ष दुर्गा मादी देवानले जानकारी दिए ।