विराटनगर । प्रतिबन्धित कोदोको घरेलु रक्सीलाई ब्राण्डिङ्ग गरेर विदेश निर्यात गर्ने उदेश्यले गठन गरिएको कार्यदलले सोमवार प्रदेश १ की सामाजिक बिकास मन्त्री उसाकला राईलाई प्रतिबेदन बुझाएको छ । प्रदेश १ योजना आयोगका सदस्य पूर्णकुमार लोक्सोमको संयोजकत्वमा गठित कार्यदलले मन्त्री राईलाई प्रतिवेदन बुझाएको हो ।
Advertisement
प्रतिबेदन बुझाउँदै आयोगका संयोजक लोक्सोमले नेपालको सविधानमै यो बिषयलाई समावेश गर्न सुझाव दिए । उनले नेपाली रक्सीको अवस्था थाहा पाउँन प्राविधिक समिति बनाउँन पनि सुझाए । ‘हामीले आफै कोदो पकाउदै हिड्न मिलेन,’ लोक्सोमले भने, ‘मन्त्रालयले नेपाली रक्सीको अवस्था थाहा पाउन प्राविधिक समिति बनाउनु पर्छ ।’
कार्यदलको पत्र बुझ्दै सामाजिक विकास मन्त्री राईले व्याण्ड भर्सेस ब्राण्ड प्रदेश सरकारको गौरवको योजना भएको बताइन् । प्रदेश सरकारले कोदो उत्पादन हुने स्थानको छनौट गरेर कोदो लगाउन शुरु गर्ने मन्त्री राईको भनाई छ । उनले बनमारा मासेर कोदो लगाइने बताइन् । गाउँपाखामा रहेको बनमारा उखेलेर कोदो रोप्ने प्रदेश सरकारको योजना रहेको जानकारी दिइन् । नेपालको उत्पादनलाई छिमेकी देशहरु भारत र चीनमा लगेर बजारीकरण गर्ने योजना पनि उनले सुनाइन् । प्रदेश सांसद इन्द्र आङबो प्रति लक्षित गर्दै मन्त्री राईले नबुझेकाहरुले यो कामको बिरोध गरेको टिप्पणी गरिन् । सांसद आङवोले यो काम सामाजिक बिकास मन्त्रालयको कार्यक्षत्र भित्र नपर्ने भन्दै प्रदेशशभामानै कुरा उठाएका थिए ।
गत बैशाख १३ गते सामाजिक बिकास मन्त्री राईले प्रदेश १ योजना आयोगका सदस्य लोक्सोमको संयोजकत्वमा कार्यदल गठन गरेकी थिइन् । ४५ दिन भित्र प्रतिवेदन बुझाउने गरी समिति गठन गरिएको भएपनि समितिले समय अपुग भएको भन्दै म्याद थप गरेको थियो ।
