विराटनगर । मोरङमा नेकपा एमालेको केपी ओली र माधव कुमार नेपाल पक्षले पार्टीका बेग्ला–बेग्लै गतिविधि गरिरहेका छन् । केन्द्रिय स्तरका नेताहरु पार्टीलाई एक बनाउने भनेर लागि परिरहेको भएपनि दुवै समुहले आ–आफ्ना गतिविधि बढाइरहेका हुन् ।
Advertisement
माधब नेपाल निकटका जिल्ला तथा प्रदेश स्तरका नेताहरु समान्नतर कमिटी निर्माण गरिरहेका छन् भने ओली समूहका नेताहरु प्रशिक्षण, सदस्यता नविकरण जस्ता गतिविधिमा केन्द्रित छन् । मोरङको बिराटनगर, बेलबारी, उर्लावारी, पथरीशनिश्चरे, रतुवामाई, बुढिगंगा लगायतका स्थानीय तहमा माधव पक्षले समानान्तर कमिटी गठन गरेको छ । समानान्तर कमिटी गठन नभई कमिटीहरु पुर्नगठन मात्रै गरिएको माधव–झलनाथ पक्षका जिल्ला अध्यक्ष चन्द्रबीर राई बताउँछन् । पार्टीका कमिटीहरु निस्कृय भएपछि सक्रिय बनाइएको उनले तर्क छ ।
यता, ओली पक्षका नेताहरु भने प्रशिक्षण तथा अधिबेशन गर्ने तयारीमा जुटेका छन् । पार्टी सदस्यता नविकरण र वडा, नगर अधिबेशन गर्ने जिल्ला कमिटीको बैठकले निर्णय गरेको थियो । ‘५ बर्षसम्म सदस्यता नविकरण भएको छैन,’ ओली निकट मानिने नेकपा एमालेका जिल्ला अध्यक्ष ऋसिकेष पोख्रेलले भने, ‘अहिले नेकपा एमाले भित्र कार्यकर्ताबाट भन्दा पनि माथिल्लो तहका नेताबाट छानिएका नेता मात्रै छौं । भदौ भित्रमा सदस्यता नविकरण र अधिबेशनहरु गर्ने गरी जिल्ला कमिटीले निर्णय गरेकाले हामी त्यही अनुसार गर्दैछौ ।’
पार्टीलाई बैधानिक हिसावले बढाइएको पोख्रेलको दावी छ । दुवै पक्षका नेताहरु कार्यकर्तालाई आफ्नो पक्षमा पार्न सक्रिय भएर लागेका छन् । माधव पक्षले पारुल क्षेत्रीको अध्यक्षतामा महानगर कमिटी गठन गरेको छ भने ओली पक्षका नेता सागर थापाको अध्यक्षतामा अर्को कमिटी छ । दुवै कमिटी सक्रिय छन् । दुवै पक्षले आ–आफ्नो कमिटी आधिकारिक भएको दावी गर्दै आएका छन् ।
मोरङको उर्लाबारीमा केही दिन अघि नेकपा एमाले नगर कमिटीको विस्तारित बैठकसमेत विथोलिएको थियो । उर्लाबारी–८ स्थित एभरेष्ट फनपार्कमा संस्थापन पक्षले नगरस्तरीय विस्तारित बैठक बोलाएको थियो । बैठक सुरु हुनुअघि नै बैठकस्थलमा राखिएका कुर्सी तोडफोड गरिएपछि बैठक भाडिएको हो । किन र कसले तोडफोड गर्यो भन्ने अहिलेसम्म यकिन भएको छैन । यो बिषयलाई लिएर दुवै पक्षका नेताहरु आरोप प्रत्यारोप गरिरहेका छन् ।
मोरङको विराटनगरमा रहेको पार्टी कार्यालय भने ओली पक्षले मात्रै प्रयोग गर्दै आएको छ । माधब पक्षले बिराटनगरमा महानगर कमिटीको कार्यालय खोलेको छ । जिल्ला कमिटीका गतिविधिसमेत माधब पक्षले त्यही कार्यालयबाट गर्ने गरेको छ । मोरङमा पूर्व मन्त्रीसमेत रहेका नेता लालबाबु पण्डीत, केन्द्रिय सदस्य, बिनोद ढकाल लगायतका नेताले ओली पक्षको नेतृत्व गरेका छन् भने माधब पक्षमा महेश रेग्मी लगायतका नेताहरु छन् ।
