मोरङ । घरमा कारखाना संचालन गरी भरुवा बन्दुक बनाएर बेचबिखन गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा मोरङको बेलबारी नगरपालिका–१ का ५२ बर्षीय आशबहादुर लिम्बु छन् ।
आइतबार साँझ ६ बजे बिशेष सूचनाको आधारमा ईलाका प्रहरी कार्यालय बेलबारीबाट खटिएको टोलीले उनलाई घरैबाट पक्राउ गरेको हो । १ थान भरुवा बन्दुक, २ थान बन्दुक बनाउन प्रयोग गरिने नाल, ४ थान काठको बट, १ थान फलामको पड्किने पाशो भएको बन्दुक, १ केजी बारुद, ५ थान हरिणको सिङ र १ थान बन्दुकको नाल सफा गर्ने रडसहित लिम्बूलाई प्रहरीले पक्राउ गरेको हो ।
त्यस्तै प्रहरीले ३ थान फलामको काँजो लगायत बन्दुक बनाउन प्रयोग हुने औजार पनि फेला पारेको छ । पक्राउ परेका लिम्बुका विषयमा ईलाका प्रहरी कार्यालय बेलबारीले थप अनुसन्धान गरिरहेको प्रहरीले जनाएको छ ।