विराटनगर । आइतवार दिउँसोका लागि तय भएको प्रदेश १ को प्रदेश सभा बैठक स्थगित भएको छ । प्रमुख प्रतिपक्षी दल नेपाली कांग्रेस र सत्तारुढ दल नेकपा एमालेले बैठक सार्न लिखित रुपमा माग गरेकाले बैठक स्थगित गरिएको प्रदेश सभा सचिवालयले जनाएको छ ।
Advertisement
मुख्यमन्त्री भीम आचार्यले विश्वासको मत लिनका लागि आइतवार दिउँसो साढे १२ बजे बैठक डाकिएको थियो । तर, बैठक नै नबसी प्रदेश सभा सचिवालयले सूचना जारी गरेर बैठक स्थगित भएको जानकारी दिएको हो । अब, कात्तिक १५ गते सोमबार दिउँसो साढे १२ बजे प्रदेश सभा बैठक बस्ने र सोही बैठकमा मुख्यमन्त्रीले विश्वासको मत लिने प्रदेश सभाका सचिव गोपालप्रसाद पराजुलीले जनाएका छन् ।
आइतवार बस्ने बैठकमा कांग्रेसका केही सांसदले फ्लोर क्रस गर्ने संभावना देखिएपछि कांग्रेसले बैठक स्थगित गर्न माग गरेको थियो । तर, पत्रमा भने कांग्रेसले प्रधानमन्त्री शेरबहादुर देउवाको प्रदेश १ भ्रमणका कारण बैठक स्थगित गर्न माग गरेको छ ।
यता, नेकपा एमालेले भने पार्टीको अधिवेशन चलिरहेको भन्दै बैठक सार्न माग गरेको छ । दुबै दलले माग गरेपछि सभामुखले बैठक स्थगित गराएका हुन् । बैठक स्थगित हुुँदा मुख्यमन्त्री आचार्य नेतृत्वको सरकारको आयु केही दिन भएपनि लम्बिएको छ ।
