मोरङको जहदामा एम्बुलेन्सभित्र भेटियो ३३ किलो गाँजा, दुई जना पक्राउ

विराटनगर । मोरङको जहदा गाउँपालिका-३ बाट एम्बुलेन्समा गाँजा ओसार-पसार गर्ने दुई जनालाई प्रहरीले नियन्त्रणमा लिएको छ । बुधबार राति बिशेष सूचनाका आधारमा खटिएको प्रहरी टोलीले चेकजाँचका क्रममा एम्बुलेन्सबाट गाँजा बरामद गरेको हो ।

एम्बुलेन्स चालक विराटनगर-५ का ३२ वर्षीय दुर्गाप्रसाद राजवंशी र एम्बुलेन्ससँगै रहेको को ३१ प ८८८९ नम्बरको मोटरसाइकल चालक जहदा गाउँपालिका-३ का ३२ वर्षीय दिलिप कुमार राजवंशीलाई पक्राउ गरिएको प्रहरीले जनाएको छ ।

स १ च ६५६ नम्बरको एम्बुलेन्स चेकजाँच गर्दा कालो रंगको झोलामा राखिएको अवस्थामा ३३ किलो ६१० ग्राम गाँजा बरामद भएको कोशी प्रदेश प्रहरी कार्यालय विराटनगरले जनाएको छ ।